"Restaurasaun Independénsia fó responsabilidade mai ita"
Timor-Leste selebra loron restaurasaun independensia ba dala walu iha loron 20 fulan Maiu tinan 2010.
Prezidente Repúblika Dr. José Ramos Horta, iha nia deskursu ba selebrasaun loron restaurasaun independensia Timor-Leste nian iha Palásiu Prezidensial Bairo-Pite Dili, 20-05-2010, hateten katak “Aniversáriu ida ne’e nu’udar momentu apropriadu ida atu ita haleno an kona-ba saida maka ita-nia rain foin hakat daudaun. Restaurasaun Independénsia fó responsabilidade mai ita. Selebrasaun kona-ba ninia aniversáriu konvida ita hotu atu hanoin kona-ba ita-nia krize sira, atu hametin katak momentu hirak ne’e liu tiha ona ba ita-nia kotuk. Lisaun dahuluk ba futuru maka ita tenke enfrenta nafatin, diretamente no ho determinasaun, ita-nia diferensa no difikuldade sira. Labele halo hodi loke dalan hodi habutuk diverjénsia sira no hamosu konflitu”
Iha okaziaun ne’e Prezidente realsa liu tan katak “Ita hotu tenke kontribui hodi hanoin ida de’it kona-ba kestaun vitál sira ba ita-nia futuru. Tan ne’e, ha’u husu ba governu, atu halo diálugu beibeik, envolve mós opizisaun atu harii entendimentu sira ben komun nesesáriu sira no mós solusaun ba dezafiu sira hanesan xave ne’ebé nasaun hasoru, liuliu iha setór sira Justisa, Defeza no Seguransa nian, no Dezenvolvimentu”
Iha biban ne’e Prezidente Republika fó mos kondekorasaun Kolar Orden Timor-Leste nian ba Señór Lech Walesa Prémiu Nobel Pás nian no eis-Prezidente Polónia, Señor Dr. Nitin Verna (insígnia Ordem Timor-Leste nian), fundadór EAST TIMOR EYE PROGRAM no Señór Yohei Sasakawa (insígnia Ordem Timor-Leste nian), ulun Nippon Foundation nian.
