Hodi komemora loron restaurasaun da independensia Timor-Leste nian ne’ebe mak monu iha loron 20 de Maio, Ministeriu Turismo Comersio no Industria hamutuk ho Asosiasaun Empresarius Xineses organiza eventu feira nasional ne’ebe mak halao iha kampu Demokrasia iha loron 15-21 de Maio.

Eventu ida hanesan parte ida hodi anima komunidade iha sidade Díli no mos halao promosaun ba produtus lokal ne’ebe mak povu agrikultores produs.

“Objetivu seluk husi expo ne’e atu foo koñese produtu lokal para hasae produsaun hodi hatudu ba mundu katak, Timor-Leste iha nian produtu,”dehan Presidente ACCCTO Lay Sio iha nia deskursu ba abetura Expozisaun refere.

Iha fatin hanesan mos, Vise-Primeiru-Ministru Asuntu Sosial, José Luis Guterres hateten, expozisaun ne’e importante hodi hatudu ba mundu ita saida mak Timor Leste iha.

“Politika ne’e importante hodi insentiva produsaun lokal nian. Hadia ita nia produtus atu nune’e aban-bainrua kuandu ita nia turismo dezenvolvidu ona, ema barak husi rai liur bele sosa ita nia produsaun ne’ebe mak ita niapovu produs,”dehan Jose Luis.

Alende ita tau matan ba produtus lokal artesenatus, Timor-Leste mos bele transforma produtus industriais hodi bele halao exportasaun ba rai liur.

Entertantu Komisaun Organizadora, Fernando Hi da Silva, iha nia relatoriu badak hateten, feira 20 de Maio hanesan programa permanente MTCI nian ne’ebe mak halao tinan-tinan hodi komemora loron restaurasaun da independensia ba dala walu.Ba tinan ida ne’e, MTCI hili topiku ida hanesan “Uza Produtus Rai Laran Haburas Moris Diak”.

“Objetivu mak atu promove no fo valor ba produtus lokais nu’udar eventu ida ne’ebe halo ligasaun investimento interno no investimentu externo, hodi bele promove setor hanesan Turismo, Comercio, Industria no seluk tan” dehan Fernando Hi ne’ebe mak kaer pasta hanesan mos Diretor Nasionál Comercio Domestiku.