VIII Governu Konstitusional lidera husi Xefe Negosiador no atual Ministru Koordenador ba Assuntu Ekonomiku (MCAE), Eng. Joaquim Amaral ofisialmente ohin entrega ona dokumentu relevante sira konaba Timor-Leste nia prosesu Adezaun ba Organizasaun Mundial Komérsiu (Volume II, Períudu Jullu 2021 – Marsu 2022) ba membru sira husi Komisaun Interministerial hanesan Ministru Transportes no Komunikasoins, José Agustinho da Silva, Ministru Justisa, Tiago Amaral Sarmento, Vise Ministru Turizmu, Komérsiu no Indústria, Domingos Lopes Antunes, Vise-Ministru Finansas, António Freitas, Sekretáriu Estadu Arte no Kultura, Teófilo Caldas hamutuk ho Governadór Banku Sentrál Timor-Leste (BCTL, sigla iha lian portugés) Abrão de Vasconcelos iha Reuniaun Extraordinária Komisaun Interministerial Timor-Leste nia adezaun ba Organizasaun Mundial Komérsiu (OMK) ba datoluk nian iha Salaun Suai Room, Timor Plaza.

Reuniaun ne’ebé hetan mós partisipasaun husi Diretor Ezekutivu husi Ajensia Autônomu sira ho Diretor Jeral no Nasional husi instituisaun estadu sira inkuindu ekipa téknika sira husi Grupu Traballu nian, nu’udar afirmasaun politika konaba determinasaun no vontade polítika Governu Timor-Leste nia esforsu tomak hodi sai membru Organizasaun Mundial Komérsiu haktuir husi roteiru Indikativu ne’ebé hetan ona revizaun husi Sekretariadu OMK iha Jenebra hodi sai nu’udar matadalan uniku Timor-Leste nian iha prosesu nee.
Iha sorin seluk, reuniaun nee mós nu’udar jestu hodu konsolida hanoin hotu husi parte relevante sira antes Timor-Leste partisipa iha Reuniaun Grupu Traballu Datoluk nian ho pais membru OMK sira ne’ebe tuir planu sei realiza iha Jenebra, Suísa loron 29 abril 2022.

Antes nee iha fulan Fevereiru tinan nee, Timor-Leste submete ona dokumentu lubuk ida ba negosiasaun nian hanesan; Dokumentu Elementu ba Esbosu Relatóriu Grupu Traballu nian ne’ebé elabora kompromisu iha area 25, ne’ebé Timor-Leste iha obrigasaun hodi implementa hafoin adere ba OMK. Aleinde ne’e, Timor-Leste mós submete ona revizaun ba dokumentu sira hanesan; Additional Questions and Responses from Members hodi hatan ba pergunta 58; Revizaun ba SPS Checklist; Revizaun ba SPS Action Plan; Revizaun ba TRIPS Action Plan; Revizaun ba Planu Asaun Lejizlativa (PAL); no Tradusaun ba lei sira ne’ebé foin enkaixa iha dokumentu PAL nian.

Kriasaun Komisaun Interministeriál no Grupu Traballu bazeia ba despaixu husi Primeiru Ministru ho númeru 077 /PM/VI/2021, hodi kontinua fó afirmasaun kona-bá reforsa medida serbisu ho ninia área responsabilidade balun maka kona-bá artikula polítika no medidas lejislativas ne’ebé imposta ba iha prosesu negosiasaun adezaun TL nian ba OMK. Tamba Adezaun TL ba OMK sai mós metas hosi polítika esterna nasionál ne’ebé previstu iha Programa Governu Konstitusionál Daualu nian.

Media MCAE