Sekretáriu Estadu Konselhu Ministrus

no Porta-Vóz Ofisiál Governu Timor-Leste

 

Díli, 18 Maiu, 2010

 

Timor-Leste nia Embaixadór foun ba Australia, Sua Exelênsia Abel Guterres hahú nia knaar foun

 

Embaixadór Abel Guterres, Timor-Leste nia embaixadór foun ba Australia, aprezenta nia kredensiais ohin, ba Sua Exelênsia Ms. Quentin Bryce AC iha kapitál paíz, Canberra.

Embaixadór Guterres hateten “Onra boot tebes ida mai ha’u bele reprezenta ha’u nia nasaun, Timor-Leste, i ho hakraik-an ha’u prontu servi ha’u nia povu hodi hametin relasoens amizade entre Austrália no Timor-Leste.”

Guterres iha istória ida ke naruk tebetebes ho Australia, hahú husi tempu ne’ebé nia ba to’o iha ne’ebá hanesan refujiadu husi Timor-Leste iha 1975. Entre 1975 no 1999, Guterres servisu la hatene kole hanesan ativista boot ida iha Rezistênsia Timór-Leste nian, hodi husik tomak hela nia ain-fatin bá.

Prezidente Timor-Leste, Sua Exelênsia José Ramos Horta, dehan iha serimónia tomada pose ba Embaixadór Guterres iha Timor-Leste, katak durante nia luta iha tinan hira laran, Guterres “konsege hetan enerjia no tempu atu loroloron gasta oras barak hodi buka informa, eduka no mobiliza opiniaun Austrália nian kona-ba Timor-Leste nia luta.’

‘Abel Guterres la’ós de’it hala’o nia misaun ne’e ho laran tomak, maibé nia sempre halo buat hotu-hotu ho hamnasa nafatin, ho respeitu i amizade ba ema hotu, hadook-an husi partidarizmu polítiku, no servisu hamutuk ho ema hotu-hotu, la haree ba sira nia afiliasaun polítika.”

Prezidente Horta tau neon metin ba Embaixadór Abel Guterres atu harí metin aliserse ba susesu iha programas relasoens amizade entre sidades no eskolas; ne’ebé kria atu enkoraja komunidades no eskolas iha Australia atu adopta distritu ida, sub-distritu ka eskolas iha Timór-Leste.

Iha 1999, Embaixadór Abel Guterres tuir kursu Servisus Diplomátikus iha Oxford iha Reinu Unidu (Inglaterra), no hetan diploma prestijiozu ne’e ho distinsaun. Hafoin Guterres servisu hanesan Kônsul Jerál Timor-Leste nian iha Sydney entre 2003 no 2009.

Sekretáriu Estadu Ágio Pereira dehan “Australia hanesan Timor-Leste nia vizinhu besik ida hotu; iha lasus ka relasoens ne’ebé metin tebetebes entre povu nasaun rua ne’e. Embaixadór Guterres sei reprezenta Timor-Leste ho onra no dignidade i ita laran haksolok tanba nia mak kontinua reprezenta Timor-Leste no povu Timor tomak iha Asutrália.”