Voto Pezar ba Falesimentu husi Amo Padre José Alves Martins
Prezidénsia Konsellu Ministrus
VIII Governu Konstitusionál
...........................................................................................................................
Loron 15 fulan-marsu tinan 2021
Komunikadu Imprensa
Voto Pezar ba Falesimentu husi Amo Padre José Alves Martins
Ho laran triste boot tebes no sentimentu ne’ebé kle’an, bainhira Governu Repúblika Timor-Leste simu notísia kona-ba Padre José Alves Martins, misionáriu jezuita nia mate, iha loron 14 fulan-marsu tinan 2022 iha Ospitál Vila Franka Xira, iha Portugál.
Misionáriu husi Companhia de Jesus ho idade 80, tinan barak nia hela iha Timor-Leste to’o tinan 33 no nunka sai husi país ne’e, durante okupasaun indonézia nian, nia mós sempre apoia ba populasaun no rezisténsia.
Padre José Alves Martins moris iha loron 17 fulan-jullu tinan 1941, iha São Romão de Neiva, Viana do Castelo, Portugál.
Iha loron 7 fulan-setembru tinan 1958 nia tama ba Companhia de Jesus iha Noviciado de Soutelo, iha Braga. Iha tinan 1969, nia remata ninia Teolojia ba tinan dahuluk nian, iha Universidade Katólika, Lizboa. Husi tinan 1970 to’o 1974, nia estuda no hasai lisensiatura iha Teolojia Espirituál iha Universidade Gregoriana, Roma. Iha loron 9 fulan-jullu tinan 1972 simu ordenasaun Saserdotál, iha Apúlia, Esposende, Braga.
Nia to’o mai Timor-Leste iha loron 23 fulan-setembru tinan 1974, iha ne’ebé nia hahú sai profesór no diretór espirituál iha Semináriu Diosezanu, Dili. Iha loron 7 fulan-dezembru tinan 1975 nia halai sai ho kanek kmaan tanba Semináriu hetan bombardeiu husi militár indonézia
Iha tinan 1978, nia loke hikas Semináriu iha aredór Dili nian, iha ne’ebé nia asume knaar hanesan Reitór Semináriu, husi tinan 1985 to’o 1991. Nia ezerse kargu oin-oin iha nivel diosezanu no dirije Casa de Exercícios Dare.
Iha tinan 2000, nia nomeadu hanesan Superiór rezidénsia Loiola, iha Taibesi no sai hanesan Konselleiru Bispu Dili nian. Nia sai mós hanesan Koordenadór ba formasaun permanente Kleru no Prezidente Santa Casa da Misericórdia nian.
Iha loron 9 fulan-juñu tinan 2004, nia hetan kondekorasaun ho Grau komendadór Orden Méritu Portugál husi Prezidente Jorge Sampaio. Iha fulan-maiu tinan 2012, nia hetan kondekorasaun ho medalla Orden Dom Martinho Lopes, tanba ninia apoiu ba rezisténsia timoroan no kontributu ne’ebé signifikante tebes ba luta ukun-rasik an no iha loron 11 fulan-maiu tinan 2016, nia hetan kondekorasaun ho Medalla Méritu nasionál nian. Iha loron 27 fulan-marsu tinan 2019, Papa Francisco atribui medalla Pro Ecclesia et Pontifica hodi rekoñese ninia asaun apostólika iha Timor.
Iha momentu triste ida ne’ebé kle’an ba relijiozu no povu timoroan tomak ein jerál, Porta-vos Governu nian, Ministru Prezidénsia Konsellu Ministrus, Fidelis Manuel Leite Magalhães, lori Konsellu Ministrus no Povu tomak nia naran hato’o sentidas kondolénsias ba família estimadu Padre José Martins, ba Igreja no ba família jezuita Timor-Leste nian. REMATA
