Governu promove kampaña limpeza jerál iha territóriu laran tomak
Prezidénsia Konsellu Ministrus
VIII Governu Konstitusionál
...........................................................................................................................
Dili, loron 27, fulan-janeiru, tinan 2022
Komunikadu Imprensa
Governu promove kampaña limpeza jerál iha territóriu laran tomak
Governu sei promove, aban loron 28 fulan-janeiru tinan 2022, durante loron tomak, asaun limpeza jerál iha nivel nasionál, ne’ebé sei hala’o husi funsionáriu sira órgaun no servisu administrasaun públika nian hotu no apela atu mobiliza populasaun tomak, liuliu organizasaun sira sosiedade sivíl nian no eskola sira, hamutuk hodi hala’o limpeza jerál iha fatin públiku sira, iha sira-nia bairru laran no iha sira-nia uma laran.
Kampaña ba limpeza ida-ne’e, hanesan parte ida hodi kombate surtu denge nian ne’ebé Timor-Leste afeta, ho totál kazu ne’ebé rejistu hamutuk 972 no mate ema na’in 18, tuir dadus ne’ebé fó-sai horiseik husi Ministériu Saúde. Dili maka munisípiu ne’ebé afetadu liu, ho totál kazu hamutuk 648.
Ministériu Administrasaun Estatál sei fó-sai ba órgaun no servisu administrasaun públika nian sira, diretrizes kona-ba organizasaun no distribuisaun ekipa sira ba limpeza jerál.
Iha sorumutuk tuirmai, Konsellu Ministru sei delibera kona-ba kontinuidade husi medida ida-ne’e, nune’e mós kona-ba ninia periodisidade. REMATA
