Sorumutuk Konsellu Ministrus nian iha loron 19 fulan-janeiru tinan 2022
Prezidénsia Konsellu Ministrus
VIII Governu Konstitusionál
...........................................................................................................................
Komunikadu Imprensa
Sorumutuk Konsellu Ministrus nian iha loron 19 fulan-janeiru tinan 2022
Konsellu Ministrus hala’o sorumutu iha Palásiu Governu, iha Dili, no aprova projetu Rezolusaun Governu nian, ne’ebé aprezenta husi Vise-Primeira-Ministra no Ministra Solidariedade Sosiál no Inkluzaun, Armanda Berta dos Santos, ne’ebé renova mandatu membru sira Konsellu Administrasaun husi Institutu Nasionál Seguransa Sosiál (INSS) nian, ba tinan tolu tan. Nune’e, Longuinhos Armando S. I. Leto, mantein nu’udar Prezidente Konsellu Administrasaun INSS nian. Azevedo Marçal no Cornélio Barros kontinua iha kargu vogál Konsellu Administrasaun nian. Alberto Carvalho de Araújo no Ramalho da Costa mantein ida-idak nu’udar reprezentante sira ba empregadór sira no ba traballadór sira.
Konsellu Ministrus aprova mós projetu Dekretu Governu nian rua, ne’ebé aprezenta mós husi Vise-Primeira-Ministra, ne’ebé aprova remunerasaun ba prezidente sira no fiskál úniku sira Institutu ba Defeza Direitu sira Labarik nian, I.P. no Institutu Nasionál ba Kombate HIV-SIDA, I.P., no aprova mós valór seña prezensa sira ne’ebé iha hodi selu ba ninia membru sira Konsellu Konsultivu nian. Atu determina montante konkretu sira ba remunerasaun sira ne’ebé temi ona, Governu konsidera ona valór sira ne’ebé pratika iha Institutu Públiku sira. REMATA
