……………………………………………………………………………………………………………
Komunikadu Imprensa
Sorumutuk Konsellu Ministrus nian iha loron 12 fulan-janeiru tinan 2022
Konsellu Ministru hala’o sorumutuk iha Palásiu Governu, iha Dili, no aprova ona projetu Dekretu Lei, ne’ebé aprezenta husi Ministru Justisa, Manuel Cárceres da Costa, ne’ebé ninia objetu mak aprovasaun Kódigu Rejistu Prediál nian. Diploma ne’e nia objetivu mak atu permite halo rejistu ba direitu propriedade nian ne’ebé sidadaun sira, Estadu no ema koletiva sira hetan ona ka sei hetan. Sistema Rejistu Prediál ne’e, iha karáter ida ne’ebé transparente no seguru ne’ebé sei fó konfiansa ba komérsiu jurídiku imobiliáriu, hodi bele funsiona hanesan instrumentu ida ne’ebé atu hasa’e komérsiu jurídiku ne’e, no mós komérsiu arrendamentu ka merkadu finanseiru nian.
Ikusliu, Konsellu Ministrus aprova ona projetu Rezolusaun Governu nian, ne’ebé aprezenta husi Ministru Koordenadór Asuntus Ekonómikus, Joaquim Amaral, hodi nomeia filafali Arcanjo da Silva, ba mandatu ida datoluk nian, ho durasaun tinan tolu, ba kargu nu’udar Diretór Ezekutivu Ajénsia Promosaun Investimentu no Esportasaun Timor-Leste nian, I.P. (TradeInvest). REMATA