Prezidénsia Konsellu Ministrus

VIII Governu Konstitusionál

……………………………………………………………………………………………………………

Komunikadu Imprensa

Sorumutuk Konsellu Ministrus nian iha loron 5 fulan-janeiru tinan 2022

Konsellu Ministrus hala’o sorumutuk iha Palásiu Governu, iha Dili, no aprova ona projetu sira Dekretu Governu nian, ne’ebé aprezenta husi Ministru Administrasaun Estatál, Miguel Pereira de Carvalho, ne’ebé ho objetivu atu altera no/ka kompleta regulamentu Lei Eleitorál ba Prezidente Repúblika nian, haree katak presiza salvaguarda respeitu ba norma sira ne’ebé ho objetivu atu impede propagasaun no diseminasaun COVID-19 nian husi populasaun. Tanba ne’e, aprova ona:

• alterasaun dahuluk ba Dekretu Governu nu. 5/2017, loron 27 fulan-fevereiru, ne’ebé regula kampaña no propaganda eleitorál;
• alterasaun dahuluk ba Dekretu Governu nu. 6/2017, loron 27 fulan-fevereiru, ne’ebé regula organizasaun no funsionamentu sentru votasaun no estasaun sira votu nian;
• alterasaun dahuluk ba Dekretu Governu nu. 7/2017, loron 27 fulan-fevereiru, ne’ebé regula prosedimentu sira ba votasaun nian, kontajen ba votu sira no apuramentu ba rezultadu sira;
• alterasaun dahuluk ba Dekretu Governu nu. 8/2017, loron 27 fulan-fevereiru, ne’ebé aprova prosedimentu tékniku sira ba realizasaun eleisaun prezidensiál iha estranjeiru;
• alterasaun dahuluk ba Dekretu Governu nu. 9/2017, loron 27 fulan-fevereiru, ne’ebé regula atividade observasaun nian;
• alterasaun dahuluk ba Dekretu Governu nu. 10/2017, loron 27 fulan-fevereiru, ne’ebé aprova prosedimentu tékniku sira ne’ebé hala’o atividade sira kobertura jornalístika nian ba eleisaun prezidensiál;
• alterasaun dahuluk ba Dekretu Governu nu. 12/2017, loron 27 fulan-fevereiru, kona-ba ezersísiu direitu votu nian iha ospitál no prizaun sira: alterasaun dahuluk ba Dekretu Governu nian nu. 13/2021, loron 27 fulan-fevereiru, ne’ebé regula atividade fiskalizasaun nian ba prosesu eleitorál;
• regulamentu kona-ba aprezentasaun kandidatura ba eleisaun Prezidente Repúblika nian; no
• ezersísiu direitu votu ba eleitór sira ne’ebé internadu iha sentru izolamentu profilátiku obrigatóriu, sentru izolamentu terapéutiku obrigatóriu ka ne’ebé kumpre izolamentu profilátiku obrigatóriu ka izolamentu terapéutiku obrigatóriu iha domisíliu ida-idak ka iha fatin ne’ebé admite ona tuir lei ba efeitu ne’e.

Konsellu Ministrus mós aprova ona projetu Dekretu Governu nian, ne’ebé aprezenta husi Ministru Finansas, Rui Augusto Gomes, ho objetivu atu estabelese regra sira kona-ba ezekusaun Orsamentu Jerál Estadu tinan 2022 nian. Ho projetu ida-ne’e, hakarak atu garante kontrolu orsamentál ida ne’ebé efetivu no rigorozu, no, iha tempu hanesan hodi simplifika prosedimentu sira ezekusaun orsamentál nian, ne’ebé fó kontinuidade ba mudansa sira ne’ebé implementa ona iha tinan rua liubá, ho objetivu atu fasilita ezekusaun Orsamentu Jerál Estadu nian husi órgaun no servisu sira setór públiku administrativu nian. REMATA