Sorumutuk Konsellu Ministrus nian iha loron 29 fulan-dezembru tinan 2021
Prezidénsia Konsellu Ministrus
VIII Governu Konstitusionál
...........................................................................................................................
Komunikadu Imprensa
Sorumutuk Konsellu Ministrus nian iha loron 27 fulan-dezembru tinan 2021
Konsellu Ministrus hala’o sorumutuk iha Palásiu Governu, iha Dili, no aprova projetu Dekretu Governu, ne’ebé aprezenta husi Ministru Administrasaun Estatál, Miguel Pereira de Carvalho, ne’ebé substitui Ministru Planu no Ordenamentu, José Maria dos Reis, Dekretu Governu ne’e ho objetivu atu estabelese remunerasaun ba traballadór, koordenadór no titulár husi órgaun sira Ajénsia Dezenvolvimentu Nasionál, I.P. (ADN) nian. Projetu ida-ne’e hanesan rezultadu husi reestruturasaun ne’ebé halo liuhusi Dekretu-Lei nu. 60/2020, loron 25 fulan-novembru, ne’ebé transforma ona ADN sai institutu públiku ida, ne’ebé integra iha Administrasaun Indireta Estadu nian.
Konsellu Ministrus mós aprova proposta ne’ebé aprezenta husi Ministru Koordenadór Asuntus Ekonómikus, Joaquim Amaral, no husi Ministru Petróleu no Minerais, Víctor da Conceição Soares, ba prorrogasaun prazu depózitu provizaun nian ba kompartisipasaun Estadu iha ámbitu Akordu Espesiál Investimentu nian ne’ebé halo ona ho TL Cement, Lda. to’o loron 31 fulan-dezembru tinan 2022. Akordu Espesiál Investimentu entre Estadu Timor-Leste no TL Cement, Lda, hala’o ona iha loron 17 fulan-maiu tinan 2016, hafoin ida ne’e, liuhusi Rezolusaun Governu nu. 41/2016, loron 23 fulan-novembru, aprova ona partisipasaun Estadu nian iha sosiedade komersiál ida-ne’e. Iha data hanesan, parte sira ne’e hala’o kontratu-promesa ida hodi aumenta kapitál no transforma sosiedade tuir kuota ba sosiedade anónima, hafoin kria konta bankária ida ne’ebé titulada husi Autoridade Nasionál Petróleu no Minerais (ANPM) hodi garante fundu sira ne’ebé presiza ba investimentu.
Ikusliu, Konsellu Ministrus aprova projetu Dekretu-Lei ida ne’ebé aprezenta husi Ministru Finansas, Rui Augusto Gomes, ne’ebé ho objetivu atu kria no regula apoiu finanseiru temporáriu no estraordináriu sira ne’ebé sei fó ba empreza empregadór no ba traballadór individuál sira ne’ebé la servisu ba ema ka instituisaun seluk no ne’ebé rejista ona iha rejime kontributivu seguransa sosiál nian. Objetivu husi diploma ne’e atu hamenus impaktu ekonómiku pandemia nian, no mós hodi kontribui ba manutensaun postu traballu sira no sobrevivénsia empreza sira nian. REMATA
