……………………………………………………………………………………………………………
Dili, loron 27, fulan-dezembru, tinan 2021
Komunikadu Imprensa
Votu Pezar ba Desmond Tutu nia mate
Governu Timor-Leste, lori Timoroan tomak nia naran, hato’o ninia votu pezár ne’ebé kle’an ba arsebispu súl-afrikanu Desmond Tutu, Nobel Pás no símbolu luta nian kontra apartheid nia mate.
Arsebispu anglikanu Desmond Tutu ne’e hakotu iis iha loron 26 fulan-dezembru tinan 2021, ho tinan 90, iha Sidade Cabo, iha Áfrika Súl.
Desmond Tutu simu Prémiu Nobel Pás nian iha tinan 1984 tanba ninia ativizmu kontra rejime segregasaun rasiál iha Áfrika Súl. Iha dékada 90, lidera Komisaun Verdade no Rekonsiliasaun país ne’e nian, iha prosesu ezaustivu ida-ne’ebé investiga krime sira durante tempu apartheid nian no marka ona pasu kura nian ida ne’ebé krusiál durante tranzisaun Áfrika Súl nian, husi apartheid ba demokrasia. Durante ninia moris tomak nia sai nu’udár defensór ida-ne’ebé firme loos ba justisa, liberdade no ba direitus umanus.
Nune’e, Governu Repúblika Demokrátika Timor-Leste, hamutuk ho ema hotu ne’ebé sente lakon Desmond Tutu no, lori nia naran no lori povu timoroan tomak nia naran, hato’o sira-nia sentidas kondolénsias ba família, ba belun sira no ba povu sulafrikanu tomak.
Portavós Governu nian, Ministru Fidelis Magalhães, salienta katak “legadu Desmond Tutu nian sei moris nafatin, sei lembra hanesan símbolu luta nian ida ba justisa, liberdade no ba direitus umanus”. REMATA