Max Stahl nia ahi-kadesan to’o ona mai Timor-Leste iha loron 15 fulan-dezembru tinan 2021. Max Stahl nu’udar jornalista ida ne’ebé responsavel ba filmajen husi imajen sira iha Santa Cruz, iha tinan 1991, ne’ebé permite atu bolu atensaun ba situasaun ne’ebé País hasoru, no koloka Timor-Leste iha topu ajenda internasionál nian, ne’ebé sai hanesan kontributu importante ida ba autodeterminasaun Povu Timoroan nian.

Ahi-kadesan Max Stahl nian, ne’ebé mate iha loron 28 fulan-outubru tinan 2021 liubá, simu husi Ministru Fidelis Magalhães, reprezenta Primeiru-Ministru, membru Governu balu no husi eis-Prezidente Repúblika Xanana Gusmão no José Ramos Horta iha Aeroportu Internasionál Prezidente Nicolau Lobato.

Tuirmai kontinua halo prosesaun liuhusi dalan prinsipál sira iha sidade to’o ba Sentru Audiovizuál Max Stahl iha Timor-Leste (CAMSTL), ho parajen ida hodi fó omenajen iha sede Komité 12 de Novembru.

Ahi-kadesan Max Stahl nian tau iha CAMSTL to’o kinta-feira atu sidadaun sira bele ba fó omenajen ikus nian no iha loron 17 sei hala’o serimónia fúnebre inklui misa iha tuku 9 dadeer iha Igreja Motael, tuir kedas ho marxa ida to’o ba Semitériu Santa Cruz, iha ne’ebé sei haloot Max Stahl nia ahi-kadesan.

Serimónia sira iha semitériu Santa Cruz, inklui mós atribuisaun kondekorasaun foun ho títulu póstumu ba Max Stahl no entrega bandeira nasionál ba família.