Sorumutuk Konsellu Ministrus nian iha loron 10 fulan-dezembru tinan 2021
Prezidénsia Konsellu Ministrus
VIII Governu Konstitusionál
...........................................................................................................................
Komunikadu Imprensa
Sorumutuk Konsellu Ministrus nian iha loron 10 fulan-dezembru tinan 2021
Konsellu Ministrus hala’o sorumutuk iha Palásiu Governu, iha Dili, no aprova projetu Dekretu Governu nian ne’ebé halo alterasaun da-neen ba Dekretu Governu nu. 2/2007, loron 1 fulan-agostu, ne’ebé regula Estatutu Titulár Órgaun Soberania nian sira, ne’ebé aprezenta husi Ministru Prezidénsia Konsellu Ministrus, Fidelis Manuel Leite Magalhães. Projetu ida-ne’e ho hanoin atu klarifika rejime asesu ba asisténsia médika hosi membru Governu sira, hodi fasilita ninia implementasaun prátika.
Konsellu Ministrus mós aprova projetu Rezolusaun Governu nian kona-ba Polítika Nasionál Ensinu Superiór, ne’ebé aprezenta husi Ministru Ensinu Superiór, Siénsia no Kultura, Longuinhos dos Santos. Projetu ida-ne’e halo kriasaun ba polítika ida ne’ebé ho objetivu atu konsolida, estabiliza no armoniza setór ensinu superiór nasionál, nune’e permite atu kumpre devér Estadu nian kona-ba direitu ba edukasaun ho kualidade, no atu tulun kreximentu ida ne’ebé sustentavel liu husi setór ida-ne’e ba dezenvolvimentu futuru país nian. Tanba ne’e, importante tebetebes atu promove polítika ensinu superiór ida ne’ebé bele tuir prinsípiu igualdade, universalidade no, liuliu, atu realiza interese públiku nasionál. REMATA
