Sorumutuk Konsellu Ministrus nian iha loron 1 fulan-dezembru tinan 2021
Prezidénsia Konsellu Ministrus
VIII Governu Konstitusionál
...........................................................................................................................
Komunikadu Imprensa
Sorumutuk Konsellu Ministrus nian iha loron 1 fulan-dezembru tinan 2021
Konsellu Ministrus hala’o sorumutuk iha Palásiu Governu, iha Dili, no aprova ona ho alterasaun ba projetu Dekretu Governu kona-ba Regulamentu Internu Komisaun Asuntus Tasi nian ne’ebé aprezenta husi Ministru Defeza, Filomeno da Paixào de Jesus.
Projetu Dekretu Governu ida-ne’e mai hafoin aprovasaun Dekretu-Lei nu. 39/2020, loron 23 fulan-setembru, ne’ebé kria Sistema Autoridade Marítima (SAM), no prevee ba Komisaun Asuntus Tasi, hanesan órgaun ne’ebé iha kompeténsia hodi ezerse kontrolu polítiku ne’ebé efetivu kona-ba atuasaun Autoridade Marítima Nasionál nian.
Konsellu Ministrus aprova projetu deliberasaun ne’ebé aprezenta hamutuk husi Primeiru-Ministru Taur Matan Ruak ho Ministru Defeza, Filomeno da Paixão de Jesus, kona-ba ezonerasaun no nomeasaun Xefe Estadu-Maiór Forsas Armadas (XEMFA), no Komandante Komponente sira F-FDTL nian. Proposta ezonerasaun no nomeasaun refere, sei submete ba aprovasaun Sua Exelénsia Prezidente Repúblika nian.
No ikusliu, Konsellu Ministrus aprova projetu Dekretu-Lei kona-ba Sentrus Akollimentu Multifunsaun (SAMF), ne’ebé aprezenta husi Ministru Administrasaun Estatál, Miguel Pereira de Carvalho. Sentru akollimentu sira-ne’e sei uza hanesan alojamentu provizóriu ba vítima asidente grave no katástrofe sira. REMATA
