Sorumutuk Konsellu Ministrus nian iha loron 11 fulan-novembru tinan 2021
Prezidénsia Konsellu Ministrus
VIII Governu Konstitusionál
...........................................................................................................................
Komunikadu Imprensa
Sorumutuk Konsellu Ministrus nian iha loron 11 fulan-novembru tinan 2021
Konsellu Ministrus hala’o sorumutu iha Palásiu Governu, no aprova ona projetu proposta Rezolusaun Parlamentu Nasionál hodi ratifika adezaun Timor-Leste nian ba Konvensaun husi 1973, kona-ba Regulamentu Internasionál hodi evita abalroamentu sira iha Tasi-laran. Ministru Transportes no Komunikasoins, José Agustinho da Silva, maka aprezenta Projetu proposta rezolusaun ne’e. Konvensaun ida-ne’e elabora ho objetivu atu garante seguransa navegasaun nian no estabelese regra navegasaun sira ne’ebé ró-boot no ró-ki’ik sira seluk tenke tuir hodi evita abalroamentu iha tasi-laran.
Aprova mós projetu Rezolusaun Governu nian, ne’ebé Vise-Primeira-Ministra no Ministra Solidariedade Sosiál no Inkluzaun, Armanda Berta dos Santos aprezenta, kona-ba Estratéjia Nasionál ba Protesaun Sosiál (ENPS) ba períodu tinan 2021-2030.
Objetivu hosi aprovasaun estratéjia ida-ne’e mak atu promove evolusaun integrada sistema protesaun sosiál nian, hodi haluan ninia kobertura no alkanse, atu nune’e, masimiza ninia impaktu iha redusaun ki’ak no vulnerabilidade nian.
Estratéjia ne’e mós atu konsolida direitu sira ba seguransa sosiál no ba asisténsia sosiál nian, no mós asesu ho forma inkluziva ba servisu sosiál sira, ba edukasaun no ba saúde. ENPS ne’e estabelese nu’udar objetivu estratéjiku sira, hamenus ki’ak, hadi’a no habelar seguransa sosiál ba traballadór sira no dezenvolvimentu institusionál.
Konsellu Ministrus aprova projetu Dekretu-Lei, ne’ebé aprezenta husi Ministru Asuntus Parlamentares no Komunikasaun Sosiál (MAPKOMS), Francisco Martins da Costa Pereira Jerónimo, kona-ba kriasaun subsídiu ida ba profisionál sira ne’ebé dezenvolve ona atividade jornalístika, ho solisitasaun Governu nian, hodi fó sai notísia sira kona-ba virus SARS-CoV-2, durante estadu emerjénsia nian.
Profisionál sira-ne’e hala’o ona sira-nia funsaun ho forma ezemplár, hodi kontribui ativamente ba divulgasaun informasaun ne’ebé kredivel no nesesária kona-ba prevensaun no kombate pandemia iha territóriu nasionál.
MAPKOMS, liuhusi despaxu, maka sei aprova lista profisionál sira ne’ebé sei benefisia husi subsídiu ida-ne’e, bazeia ba informasaun ne’ebé fornese husi Sala Situasaun Sentru Integradu Jestaun Krize ka husi Diresaun Nasionál Diseminasaun Informasaun.
Ikusliu, Vise-Primeira-Ministra no Ministra Solidariedade Sosiál no Inkluzaun, Armanda Berta dos Santos, no Ministra Saúde, Odete Maria Freitas Belo, hanesan Prezidente no Vise-Prezidente husi Komisaun Interministeriál ba Elaborasaun no Koordenasaun ba Ezekusaun Planu Vasinasaun kontra COVID-19, halo aprezentasaun ida ba Konsellu Ministrus kona-ba pontu situasaun kampaña vasinasaun kontra COVID-19.
Vasinasaun joven sira ho idade entre tinan 12 to’o 17 hahú ona iha loron 27 fulan-outubru no to’o horiseik loron 10 fulan-novembru, totál joven na’in 15.002 ho idade 18 mai kraik simu ona vasina doze dahuluk.
Kona-ba sira ne’ebé maka ho idade 18 liu, 76,4% simu ona pelumenus doze ida no 51% husi populasaun kompleta ona vasinasaun.
Munisípiu tolu ho persentajen vasinasaun boot liu maka munisípiu Kovalima (93%), Vikeke (90,7%), no Dili (83,4%). Munisípiu sira ho persentajen vasinasaun ki’ik liu maka munisípiu Ermera (59,8%), Likisá (63,1%) no Bobonaru (63,6%). REMATA
