Sorumutuk Konsellu Ministrus nian iha loron 22 fulan-setembru tinan 2021
Prezidénsia Konsellu Ministrus
VIII Governu Konstitusionál
...........................................................................................................................
Komunikadu Imprensa
Sorumutuk Konsellu Ministrus nian iha loron 22 fulan-setembru tinan 2021
Konsellu Ministrus hala’o sorumutuk iha Palásiu Governu, iha Dili, no hafoin halo análize ba aprezentasaun kona-ba pontu situasaun epidemiolójika país nian, husi koordenadór sira Sala Situasaun Sentru Integradu Jestaun Krize (SIJK) nian, deside ona atu:
- propoin ba Sua Exelénsia, Señór Prezidente Repúblika, Francisco Guterres Lú Olo, renovasaun ba estadu emerjénsia nian, ba loron 30 tan. Ho hanoin katak kauza determinante sira ne’ebé justifika ona deklarasaun estadu emerjénsia no ninia renovasaun sira kontinua mantein, no atubele evita no neutraliza risku propagasaun sira husi variante foun SARS-CoV-2, no nune’e bele proteje saúde públika no kapasidade resposta husi Sistema Nasionál Saúde nian, Governu propoin ba Señór Prezidente Repúblika katak, ho renovasaun estadu emerjénsia nian, permite suspensaun ka restrisaun ba direitu no garantia fundamentál balun.
- aprova projetu Rezolusaun Governu nian ne’ebé mantein impozisaun serka sanitária iha munisípiu Dili to’o tuku 23:59 loron 29 fulan-setembru;
Nune’e, mantein impozisaun proibisaun sirkulasaun ema sira-nian entre munisípiu Dili no sirkunskrisaun administrativa sira-seluk, exetu iha kazu hirak ne’ebé iha fundamentu forte tanba razaun seguransa públika, saúde públika, asisténsia umanitária, manutensaun ba sistema abastesimentu públiku ka razaun seluk ne’ebé presiza atu hala’o ba interese públiku nian. La inklui iha proibisaun ba sirkulasaun ida-ne’e indivíduu sira ne’ebé komprova vasinasaun kompleta (doze rua) kontra COVID-19, no mós ba labarik sira ho idade tinan 6 ne’ebé akompaña ema sira ne’e.
- hakotu impozisaun serka sanitária iha munisípiu Baukau, Ermera no Kovalima, ne’ebé remata ohin iha tuku 23:59.
- aprova projetu Rezolusaun Governu nian ne’ebé bandu organizasaun no realizasaun serimónia fúnebre iha edifísiu sira iha ne’ebé instala órgaun ka servisu administrasaun direta no indireta Estadu, iha memória funsionáriu, ajente ka traballadór sira administrasaun públika nian.
Vise-Primeira-Ministra no Ministra Solidariedade Sosiál no Inkluzaun, Armanda Berta dos Santos no Ministra Saúde, Odete Maria Freitas Belo, hanesan Prezidente no Vise-Prezidente, respetivamente, husi Komisaun Interministeriál ba Elaborasaun no Koordenasaun Ezekusaun Planu Vasinasaun kontra COVID-19, halo ona aprezentasaun ida ba Konsellu Ministrus kona-ba prosesu implementasaun no funsionamentu sertifikadu eletróniku vasinasaun nian. Sistema ne’e lansa ona, iha loron 10 fulan-juñu liubá, iha altura ida-ne’ebé halo lansamentu ba doze daruak vasinasaun kontra COVID-19 no funsiona liuhusi aplikasaun ba telemovel RSETL husi Programa Saúde Família nian. Plataforma ne’e kontein rejistu vasinasaun kontra COVID-109 nian no funsiona mós hanesan komprovativu ba realizasaun viajen husi munisípiu sira ne’ebé abranje hela iha serka sanitária.
Ikusliu, responsavel sira husi Elaborasaun no Koordenasaun Ezekusaun Planu Vasinasaun kontra COVID-19 halo ona mós aprezentasaun ida kona-ba preparasaun implementasaun vasina Pfizer nian iha territóriu nasionál, ne’ebé hodi permite vasinasaun foin-sa’e sira ho idade husi tinan 12 to’o 17. Mekanizmu COVAX konfirma ona disponibilidade hodi haruka doze 100.620, ne’ebé sei to’o iha país iha tempu badak laran. Tuir planu ne’ebé aprezenta vasinasaun ne’e sei realiza iha eskola sira no alunu foin-sa’e rihun 50 sira husi 6 0 to’o 110 liseu, husi munisípiu pre-selesionadu sira, maka sei simu vasina ba dahuluk. Iha faze daruak nian sei vasina alunu sira seluk no ba foin-sa’e sira ne’ebé la rejista iha eskola sira. Doze daruak husi vasina ne’e nian sei administra ho intervalu loron 21. Preparasaun ba kondisaun nesesária armazenamentu vasina nian sei realiza iha SAMES ho apoiu tékniku no finanseiru UNICEF nian. Prepara ona prosedimentu operasionál sira, ba armazenamentu, transporte, jestaun no aplikasaun vasina nian, ne’ebé sei asegura ho apoiu tékniku husi Organizasaun Mundiál Saúde nian. Vasina Pfizer kontra COVID-19 ne’e iha efikásia 95% kontra infesaun sintomátika SARS-CoV-2 nian. REMATA
