Sorumutuk Estraordináriu Konsellu Ministrus nian iha loron 13 fulan-setembru tinan 2021
Prezidénsia Konsellu Ministrus
VIII Governu Konstitusionál
...........................................................................................................................
Komunikadu Imprensa
Sorumutuk Estraordináriu Konsellu Ministrus nian iha loron 13 fulan-setembru tinan 2021
Konsellu Ministru hala’o sorumutuk iha Palásiu Governu, iha Dili no delibera ona atu dekreta Lutu Nasionál ba antigu Prezidente Repúblika Portugeza Jorge Sampaio nia mate, iha territóriu nasionál tomak, ba períodu loron tolu, to’o tuku 07.59 loron 16 fulan-setembru. Durante períodu lutu nasionál, bandeira nasionál sei hasa’e to’o ai-rin klaran de’it (meia aste), iha país laran tomak iha fatin sira ne’ebé mak obrigatóriu tenke uza, inklui iha misaun diplomátika sira.
Jorge Sampaio, mate iha loron 10 fulan-setembru, nu’udar personalidade ida importante tebes ne’ebé maka defende povu no valór konstitusionál Timoroan nian.
Primeiru-Ministru, iha loron sesta, afirma ona katak Jorge Sampaio “tama iha istória nu’udar Prezidente ne’ebé maka kontribui maka’as ba Restaurasaun Independénsia Nasionál, iha ne’ebé nia mai nu’udar konvidadu de-onra iha serimónia ne’ebé hala’o iha loron 20 fulan-maiu tinan 2002”. Xefe Governu mós hateten tan katak “Eis Prezidente Jorge Sampaio sei lembra iha mundu nu’udar figura boot ida ba kauza no liberdade no rekoñese Na’i Ulun ne’e nu’udar Belun Boot Timor-Leste no Timoroan sira-nian”.
Iha tinan 2016, Jorge Sampaio simu Grande Kolár Orden Timor-Leste nian, hanesan rekoñesimentu ba ninia solidariedade no apoiu ativu” iha luta ba independénsia ita-nia país nian. Kondekorasaun ne’e entrega iha Lisboa, husi atuál Primeiru Ministru, Taur Matan Ruak, ne’ebé iha momentu ne’ebá, nu’udar Prezidente Repúblika. Iha Okaziaun ne’e, Taur Matan Ruak manifesta “rekoñesimentu kle’an ba umanizmu, espresaun solidariedade nian lubun ida no apoiu ativu durante tinan barak, ne’ebé fó-moris hodi luta ba liberdade, autodeterminasaun no independénsia Timor-Leste nian”, ne’ebé maka labele konta ho númeru.
Iha ninia vizita ofisiál ikus nian nu’udar Xefe Estadu, iha tinan 2006, Parlamentu Nasionál atribui ba nia títulu Sidadaun Onoráriu Repúblika Demokrátika Timor-Leste nian.
Porta-Voz Governu nian, Ministru Fidelis Magalhães, iha loron sesta semana kotuk, hato’o kondolénsia ba família no belun sira eis-Prezidente nian no afirma katak “Jorge Sampaio nafatin iha povu timoroan nia fuan ba ninia kompromisu ne’ebé kle’an ba direitus umanus, justisa no solidariedade”. REMATA
