Informasaun kona-ba apoiu finanseiru ba kazu mate ka inkapasidade tanba rezultadu husi inokulasaun ho vasina kontra COVID-19
Prezidénsia Konsellu Ministrus
VIII Governu Konstitusionál
...........................................................................................................................
Komunikadu Imprensa
Informasaun kona-ba apoiu finanseiru ba kazu mate ka inkapasidade tanba rezultadu husi inokulasaun ho vasina kontra COVID-19
Konsellu Ministrus aprova ona projetu Dekretu-Lei iha loron 21, fulan-jullu, tinan 2021, ba kriasaun apoiu finanseiru ba kazu mate ka inkapasidade tanba rezultadu husi inokulasaun ho vasina kontra COVID-19.
Maske risku husi efeitu sekundáriu grave ne’ebé provoka husi vasina kontra COVID-19 ki’ik tebes, ne’ebé kompensa makas tebes ho benefísiu husi vasinasaun ba populasaun einjerál, ho ninia efikásia ne’ebé komprova ona atu prevene kazu grave no mate, Governu deside ho diploma ida-ne’e prevene situasaun, exesionál loos, iha ne’ebé ninia efeitu sekundáriu sira grave liu, hodi prevee kompensasaun loloos ba ema ne’ebé hetan efeitu sekundáriu hirak ne’e.
Projetu Dekretu-Lei ne’e haruka tiha ona ba Prezidente Repúblika ninia apresiasaun iha loron 29 fulan-jullu no sei hein promulgasaun.
Dekretu-Lei ne’e define katak iha kazu inkapasidade ki’ik liu 30% ne’ebé provoka husi vasina kontra COVID-19 sei atribui kompensasaun ida ho valór dolar amerikanu rihun ida, karik inkapasidade ne’ebé iha husi 30% to’o 70% sei atribui valór dolar amerikanu 2100 no iha kazu vasina provoka inkapasidade boot liu 70% sei atribui dolar amerikanu rihun 7.
Iha kazu mate ne’ebé bele akontese tanba simu vasina, sei atribui kompensasaun ida ho valór dolar amerikanu rihun sanulu.
Verifikasaun ba situasaun mate nian ka inkapasidade no ninia relasaun ho vasina kontra COVID-19 sei hala’o liuhusi avaliasaun médika no Ministériu Saúde maka sei responsável ba rekoñesimentu direitu apoiu ne’e nian.
To’o agora Ministra Saúde seidauk konfirma ka informa Konsellu Ministrus kona-ba kazu ruma, ne’ebé komprova ona, husi mate ka efeitu segundariu grave katak provoca husi vasina hasoru COVID-19.
Se karik iha kazu komprovadu ruma, maske seidauk promulga Dekretu-Lei ne’e, Ministériu relevante sira, tuir orientasaun Konsellu Ministrus no Primeiru-Ministru nian, tenke halo intervensaun hodi providensia apoiu ba vitima sira.
