Primeiru-Ministru, Taur Matan Ruak, apresia no kontente ho programa vasinasaun iha Munisípiu Baukau ne’ebe atinji ona 42% [1a doze].

Xefe Governu hato’o nia satisifasaun ne’e iha sorumutu ho ekipa Task Froce ba Programa Imunizasaun Munisípiu Baukau nian, iha Salaun Administrasaun Munisípiu, sesta ne’e, loron 20 fulan-agostu tinan 2021, hafoin rona relatoriu kona-ba progresu vasinasaun iha Munisipiu Baukau, ne’ebe relata hosi Vise Ministru Estatal, Lino de Jesus Torezão.

“Ha’u kontente ho rezultadu ne’ebé iha embora iha difikuldade, ne’e hatudu katak ita-boot sira halo esforsu, i ne’e ha’u parabeniza ita-boot sira nia sakrifisiu”, dehan Xefe Governu.

“Ita nia esforsu oinsa lori ita-nia sidadaun simu vasina atu salva sira-nia vida hosi COVID-19, Governu la iha intensaun seluk, intensaun mak salva povu nia vida, ne’e importante”, tenik Xefe Governu.

Aproveita bian ne’e, Xefe Governu kontinua ekoraja sidadaun sira ne’ebe seidauk simu vasina atu simu vasina hodi hasaes an hosi kontajiu COVID-19, liuliu evita ospitalizasaun no óbitu, tanba daudaun ne’e ema sira ne’ebe positivu iha kuarentena no Izolamentu Vera Crus 90% sira ne’ebe seidauk vasina.

Tuir dadus hosi Ekipa Task Force Munisipiu Baukau, relata katak, hosi fulan-abril to’o loron 19 fulan Agostu 2021, ema rihun 30,429 ka 42% mak simu ona vasina doze dahuluk iha Baukau no ema rihun 8,806 ka 12% mak simu ona vasina doze daruak, nune’e total kumulativu populasaun Baukau ne’ebé simu ona vasina dahuluk no daruak hamutuk ema rihun 39, 235 hosi populasaun eleizivel rihun 73, 317 iha Munisipiu Baukau.

Entertantu tuir Ministru Administrasaun Estatal, Miguel de Carvalho ne’ebé responsabiliza ba kampaña imunizasaun ba Munisipiu Baukau no Lautem, relata katak, difikuldades ne’ebé ekipa hasoru iha programa vasinasaun ne’e mak, informasaun falsu ne’ebe kontinua espalla hodi halo povu tauk simu vasina, no distansiamentu komunidade sira nian ba asesu vasina ne’ebe dook, maibe governante ne’e garante katak sei atinji metas ne’ebe Governu determina, tanba populasaun sira hafoin hetan esplikasaun, barak mak hakarak simu vasina.