Primeiru-Ministru, Taur Matan Ruak, akompañadu hosi Ministra Negósiu Estranjeiru no Kooperasaun, Adaljiza Magno, tersa ne’e iha Rezidénsia Ofisiál Faról-Dili, hala’o enkontru kortezia ho Reprezentante Nasionál foun Banku Mundiál nian ba Timor-Leste, Sr. Bernard Harborne, ne’ebé mak mai introduz nia-an ba Xefe Governu tanba foin to’o iha Timor-Leste iha loron 5 fulan Agostu ne’e, atu hala’o nia knaar foun, hodi troka nia antesesór nijerianu, Macmillan Anyanwu.

“Ha’u-nia naran Bernard Harborne, ha’u nu’udar Reprezentante Nasionál Banku Mundiál nian no ida ne’e ha’u nia enkontru dahuluk ho Governu, ho S.E. Sr. Primeiru-Ministru”, ’esplika reprezentante Nasionál Banku Mundiál, Bernard Harborne, hafoin remata enkontru.

Iha enkontru kortezia refere, Reprezentante Nasionál Banku Mundiál foun Britániku ne’e, hala’o mós pontu diskusaun ho Xefe Governu kona-ba programa sira ne’ebé mak Banku Mundial finansia durante ne’e no ba iha tempu oin mai.

Entretantu Xefe Governu hato’o votu felisitasaun ba nia nomeasaun no fó bem-vindu, hodi aproveita agradese ba parseria ne’ebé iha durante ne’e ba apoiu prosesu dezenvolvimentu nasionál.

Xefe Governu mós fahe kona-ba prioridade sira Governu nian ne’ebé atu atinji iha durante mandatu, inklui planu rekuperasaun ekonómika nu’udar responde ba impaktu situasaun COVID-19, no Siklone Seroja ne’ebé atinji Timor-Leste iha loron 4 fulan-abril ne’ebé estraga tiha infraestrutura privadu no públiku lubuk ida hodi hatodan liután ekonomia nasaun ne’ebé estagnadu ona tanba COVID-19, ho objetivu atu Reprezentante Banku Munidial foun ne’e bele apar ho situsaun railaran.

Kona-ba luta kontra COVID-19, Reprezentante Banku Mundial ne’e espresa nia sentimentu kontente no satisfasaun liuliu iha programa nasionál imunizasaun iha Timor-Leste, ne’ebé hatudu progresu tanba iha taxa partisipasaun ne’ebé di’ak hosi sidadaun sira, hodi konsidera ne’e hanesan instrumentu prinsipál ba luta kontra COVID-19 iha Timor-Leste.

Programa sira ne’ebé Banku Mundial suporta mak hanesan iha área edukasaun, agrikultura, saúde, infraestrutura, no programa apoiu luta kontra pandemia COVID-19 ne’ebé Banku Mundiál aloka dolar amerikanu millaun 5, no área seluk tan mak iha diversifikasaun ekonomia no setór turizmu. Banku Mundiál mós halo investimentu iha área bee moos no saneamentu hamutuk ho Banku Dezenvolvimentu Aziátiku (ADB) ba Munisípiu Baukau no Dili.

Reprezentante Nasionál Banku Mundiál ba Timor-Leste ne’e, hetan nomeasaun iha loron 1 fulan abril tinan 2021.