Ministru Finansas, Rui Augusto Gomes no Chargé d’Affaires, Embaixada Estadus Unidus Amérika, Tom Daley, ohin, loron 13, fulan-agostu, tinan 2021, lansa ona Portál Komérsiu Alfandega atu promove atividade Komérsiu ida ne’ebé mak lailais liu, simples liu no justu liu. Portál Komérsiu foun ne’e sei fornese informasaun relasiona ho Komérsiu ho fasíl no gratuita liuhusi plataforma online: www.customs.gov.tl.

Portál ne’e disponível iha lian Tetun, Portugés no Inglés no kontein dokumentus eletróniku hanesan Prosedimentu, Polítika, Lei no publikasaun Komérsiu sira seluk ne’ebé mak públiku bele asesu no download. Públiku mós bele submete perguntas liuhusi plataforma chatbot no asesu notisia atualizadu relasiona ho servisu alfandegáriu sira nomós komérsiu ein-jerál.

Hafoin lansa Portál Komérsiu Alfandega, Ministru Finansas Rui Augusto Gomes mós lansa Planu Estratejiku Autoridade Aduaneira nian, ne’ebé hatuur Autoridade nia vizaun, padraun no alvu sira. Planu Estratéjiku ne’e aprezenta estratéjia Reforma Autoridade Aduaneira ba tinan lima oin mai (2021-2025) no orienta tuir valór prinsipál haat: Integridade, Profesionalizmu, Transparénsia no Respeitu. Dokumentu ofisiál ne’e bele asesu no download husi Portal Komérsiu Alfandega.

Iha nia diskursu, Ministru Finansas, Rui Augusto Gomes hateten, “Lansamentu Portál Komérsiu Alfandega no Planu Estratéjiku Tinan-Lima marka pasu importante ida tan ba Autoridade Aduaneira. Portál Komérsiu Alfandega no Planu Estratéjiku Tinan-Lima ne’e mak inisiativa ida ne’ebé signifikativu no esensialmente sei permite Autoridade Aduaneira atu kumpri sira-nia obrigasaun institusionál atu sai organizasaun ida ne’ebé mak independente, konfiável, efisiente no transparente, koloka servisus ne’ebé foku ba kliente iha Autoridade ninia prestasaun servisus prinsipál.”

“Ohin marka pasu importante ida tan iha Ita-nia jornada atu sai Autoridade ida ne’ebé profesionál no modernu,” hateten Komisáriu Interinu Autoridade Aduaneira, José de Fátima Abílio. Komisáriu ne’e rekoñese importansia husi fornese asesu ba informasaun no atendimentu públiku, konsidera mós Autoridade Aduaneira nia objetivu tempu naruk ne’ebé mak atu “Halo komérsiu lailais liu, simples liu no justu liu.”

Ministru Rui Augusto Gomes mós hato’o apresiasaun ba Vise-Ministra Finansas, Sara Lobo Brites ba ninia lideransa hodi koordena no implementa inisiativa polítika Reforma Fiskál no Jestaun Finansas Públikas partikularmente iha servisus alfandegáriu hamutuk ho funsionáriu sira iha Autoridade Aduaneira ne’ebé lidera husi Komisáriu Interinu, José de Fátima Abílio.

Partisipa iha eventu lansamentu ne’e, Charge d’Affaires Tom Daley, Diretora Misaun USAID, Zema Semunegus, Diretora Departamentu Dezenvolvimentu USAID, Teresa Miller, Reprezentante Ofisiál Kontratasaun USAID, Ana Lourenço Guterres, Diretór USAID nia Projetu Reforma Aduaneira, Mark Hamill no reprezentante husi UNCTAD, Saeid Yarandi inklui mós reprezentante husi liña ministériu relevante ne’ebé durante ne’e servisu ho USAID implementa atividade sira iha Timor-Leste.