Bispo Foun ba Diocese Maliana Dom Norberto do Amaral direje misa tomada de posse iha Maliana Domingu, loron 25 fulan Abril.

Manu Ain Amo Papa Dom Leopoldo Gerely, hato’o deskursu katak, lori Amo Papa nian naran hato’o ba Sua Exelencia Dom Noberto do Amaral provisia no susesu diak ba kna’ar foun ne’ebé ohin hala’o nuda’ar Bispo uluk ba Diocese Maliana, Maromak sei hamahan nafatin ita nia kna’ar.

Haksolok ba tamba iha loron Domingo bom pastór imi simu bibi atan foun no uluk sarani hein kleur ona no Amo Papa Bento XVI haree ba nesesidade ida ne’e iha 30 fulan Janeiru 2010 foti sacerdote, Dom Noberto do Amaral nuda’ar Bispo Dioseze Maliana nian. Husu ba sarani sira atu servisu hamutuk ho Amo Bispo atu nune’e halo kbiit sai makas liu tan no imi mós tenke habo’ot imi nia fiar ba Maromak. Hato’o obrigadu ba ukun nain sira (Governu) husi Nasional to’o lokal hahu husi kolaborasaun husi preparasaun to’o iha tomada de posse.

Dom Norberto do Amarál hato’o mós deskursu katak, ordenasaun nudar bispo ne’ebé hau simu iha tasi tolu husi Bispo Sagrante Prinsipal, Nuncio Apostóliku no Bispo konsegrante seluk ne’ebé mai husi ÁSIA ne’e laos mundu mak fó, maibe Maromak mak haraik mai hau. Ohin simu kanónika ba diocese foun Maliana atu hanai kna’ar ukun nian nuda’ar bibi atan ba sarani sira ne’ebé pertense ba Diocese Maliana no la haluha mós hato’o gratidaun profunda ba Bispo, padre husi kongregasaun ida–idak, ba parte Governu Timor-Leste hodi desponiliza osan no fó uma ida ba Bispo Maliana hodi hela provizioramente.

Nune’e mós Vise-Primeiru-Ministru, Jose Luís Guterres, lori “Governu nia naran hato’o agradesimentu ba Bispos, konvidadu, estranjeiru, sarani tomak ne’ebé hamutuk iha ne’e husi Diocese tolu, Iha instrusoens husi Primeiru-Ministru, atu koalia ho Dioseze Maliana, hodi haree saida mak imi presija tanba Governu hakarak atu tulun diocese foun ida nee. Governu ida ne’e ou Governu seluk mai sempre hamutuk ho igreja atu bele tulun ba malu tanba fundamental ba ita nia rain ida ne’e hakarak ukun mós ukun ho Paz, Domin no Dame.”

Diocese Maliana kobre Distritu tolu hanesan, Distritu Lekisá, Distritu Bobonaro, no Distritu Covalima, Maliana hanesan Sub-Distritu ida husi Distritu Bobonaro, ne’ebé jeografikamente iha fronteira parte loromonu Estadu Timor-Leste nian ne’ebé baliza ho Distritu Belun, Profinsia Nusa Tenggara Timur (NTT), Indonésia.