Sorumutuk Konsellu Ministrus nian iha loron 11 fulan-agostu tinan 2021
Prezidénsia Konsellu Ministrus
VIII Governu Konstitusionál
...........................................................................................................................
Komunikadu Imprensa
Sorumutuk Konsellu Ministrus nian iha loron 11 fulan-agostu tinan 2021
Konsellu Ministrus hala’o sorumutuk iha Palásiu Governu, iha Dili no, hafoin analiza aprezentasaun kona-ba pontu situasaun epidemiolójika país nian, ne’ebé halo husi Sala Situasaun Sentru Integradu Jestaun Krize nian, aprova ona:
- Projetu Rezolusaun Governu nian sira ne’ebé mantein impozisaun serka sanitária iha Munisípiu Dili no Munisípiu Ermera, to’o tuku 23:59 husi loron 26 fulan-agostu; no
- Projetu Rezolusaun Governu nian ne’ebé mantein konfinamentu domisiliáriu jerál ba populasaun husi Postu Administrativu Ermera no Postu Administrativu Railaku, iha Munisípiu Ermera nian, to’o tuku 23:59, husi loron 25 fulan-agostu.
Nune’e, bandu nafatin sirkulasaun ema sira-nian entre munisípiu Dili no Ermera no sirkunskrisaun administrativa sira-seluk, exetu iha kazu hirak ne’ebé nia fundamentu forte tanba razaun sira seguransa públika, saúde públika, asisténsia umanitária, manutensaun sistema abastesimentu públiku, ka razaun seluk ne’ebé presiza atu hala’o ba interese públiku nian. La inklui iha proibisaun sirkulasaun ida-ne’e indivíduu sira ne’ebé komprova vasinasaun kompleta (doze rua) kontra COVID-19, no mós labarik sira ho idade tinan 6 mai kraik ne’ebé akompaña indivíduu sira ne’e.
Iha Postu Administrativu Ermera no Postu Administrativu Railaku, mantein mós impozisaun konfinamentu domisiliáriu jerál ba ema hotu ne’ebé maka hela, ka oras ne’e iha hela iha postu administrativu rua munisípiu Ermera nian, ne’ebé tenke hela iha sira nia uma, ka iha sira nia alojamentu temporáriu, ne’ebé inklui sentru akollimentu, exetu iha situasaun ne’ebé prevee ona iha leten, liuliu tanba razaun saúde, serbisu, asesu ba sasán no servisu nesesidade bázika nian. Ema sira ne’ebé komprova vasinasaun kompleta (doze rua) kontra COVID-19 nian, la inklui iha impozisaun konfinamentu domisiliáriu ne’e.
Konsellu Ministrus aprova ona projetu Dekretu-Lei, ne’ebé aprezenta husi Ministru Obras Públikas, Salvador Soares dos Reis Pires, ba alterasaun dahuluk ba Dekretu-Lei n. 27/2010, loron 22 fulan-dezembru, ne’ebé aprova ona Rejime Jurídiku ba Sertifikasaun no Inskrisaun Empreza Konstrusaun Sivíl no Konsultoria Téknika Sivíl nian. Ho intervensaun lejizlativa ida-ne’e, hakarak elimina limitasaun ne’ebé uluk la permite empreza nasionál sira atu hala’o servisu sira konstrusaun sivíl nian ho valór aas liu dolar amerikanu millaun 7,5.
Ikusliu, Konsellu Ministrus aprova ona projetu deliberasaun, kona-ba revizaun ba valór husi tarifa sira, ba taxa konsesaun no ba penalidade sira Portu Tibar nian, ne’ebé aprezenta husi Ministru Finansas, Rui Augusto Gomes. Projetu Dekretu-Lei ida-ne’e hetan ona deliberasaun iha Sorumutuk Konsellu Ministrus iha loron 28 fulan-jullu tinan 2021, maibé, tanba iha alterasaun balun iha faze redasaun finál nian, presiza submete fali Dekretu Lei ne’e ba deliberasaun foun Konsellu Ministrus nian. Revizaun ba valór hirak-ne’e ho fatór indeksasaun 1,061, konsidera diminuisaun tráfegu karga nian, kompara ho previzaun sira, konsidera realidade ekonómika iha tinan hirak ikus ne’e, konsidera difikuldade sira ne’ebé rezulta husi pandemia COVID-19, konsidera mós vontade konsesionária nian hodi kontinua dezenvolve projetu no hahú opera ho lais liu, no konsidera mós katak valór sira ne’ebé maihusi revizaun ne’e hanesan ho valór sira ne’ebé sei vigora hela, karik konsesionária hahú ona operasaun iha data ne’ebé prevee ona. REMATA
