Iha loron 5 fulan-agostu tinan 2021, iha Bairru Faról, Dili, hala’o serimónia fó pose ba espesialista antikorrupsaun nian na’in-11 ne’ebé sei hala’o funsaun diresaun no xefia, iha diresaun tolu KAK nian, husi períodu tinan 2021 to’o tinan 2023.

Eventu ne’e lidera husi Komisáriu KAK nian, Sérgio Hornai, konta ho partisipasaun husi Ministru Prezidénsia Konsellu Ministrus, Fidelis Magalhães, Komisária Funsaun Públika, Maria de Jesus Sarmento, Provedora Direitus Umanus no Justisa, Jesuina Gomes, no reprezentante seluk husi setór públiku, justisa, sosiedade sivíl no husi igreja.

Ministru Fidelis Magalhães, iha ninia diskursu, lori Governu nia naran kongratula emposadu foun sira no subliña importánsia husi instituisaun ne’e atu iha “kuadru profisionál sira ba aseitasaun, konfiansa no hetan respeita husi públiku”.

Governante ne’e mós asegura katak “Governu nafatin kompromete atu investe hodi hadi’a rekursus umanus administrasaun públika nian no iha  tempu hanesan atu garante apoiu polítiku ba esforsu nasionál hodi luta kontra korrupsaun”. Tanba “atu kria instituisaun no halo Lei ne’e fasil tebes, la komplikadu”, problema iha implementasaun, bainhira iha ka laiha kuadru-legál ida ne’ebé adekuadu, karik iha vontade ou laiha no apoiu polítiku,  no karik iha ka laiha kapasidade institusionál”.

Governante ne’e mós koa’lia liu ba mudansa pozitiva sira ne’ebé rejista ona iha luta kontra korrupsaun no investimentu husi Komisaun  ba prevensaun, hodi destaka mós katak “laiha prevensaun, jerasaun foun, iha futuru, sei preokupa liu ho foti-an no konkista matéria sira, kompara ho valór sira seluk ne’ebé prodús sidadaun sira ne’ebé ho integridade”.

Iha serimónia ne’e, fó ona pose ba José de Araújo Verdial, hanesan Diretór Investigasaun, Luis Ersio de Jesus Ximenes Guterres, hanesan Diretór Apoiu no Kooperasaun, Emílio Freitas Quintas, hanesan Xefe Unidade Investigasaun Kriminál, Carlos Bento Mau Bere, hanesan Xefe Unidade Pesoál Apoiu nian, Rosário Salsinha, Diretór Prevensaun no Sensibilizasaun, Euclides Vidal Madeira, hanesan Xefe Unidade Informasaun no Seguransa, Sérgio Gonçalves, hanesan Xefe Unidade Planeamentu, Akizisaun no Kontratasaun, Cirilo Hoas Loca Abi, ba Xefe Unidade Estudu no Avaliasaun ba Risku sira, António Alves da Cruz, hanesan Xefe Unidade Inspesaun no Monitorizasaun, Leonilda Rosa Soares, hanesan Xefe Unidade Promosaun ba Valór sira Integridade nian, no Maria Virgínia Pereira da Costa Belo, hanesan Xefe Unidade Jestaun Finanseira e Lojístika.