Sorumutuk Konsellu Ministrus nian iha loron 21 fulan-jullu tinan 2021
Prezidénsia Konsellu Ministrus
VIII Governu Konstitusionál
...........................................................................................................................
Komunikadu Imprensa
Sorumutuk Konsellu Ministrus nian iha loron 21 fulan-jullu
Konsellu Ministrus hala’o sorumutuk iha Palásiu Governu, iha Dili, no hafoin halo análize ba aprezentasaun kona-ba Pontu situasaun epidemiolójika nasionál, husi Sala Situasaun Sentru Integradu Jestaun Krize nian, Konsellu Ministrus delibera ona atu propoin ba Sua Exelénsia, Señór Prezidente Repúblika, Francisco Guterres Lú Olo, renovasaun estadu emerjénsia nian, ba loron tolunulu tan. Ho hanoin katak kauza determinante sira ne’ebé justifika ona deklarasaun estadu emerjénsia no ninia renovasaun sira kontinua mantein, no atubele evita no neutraliza risku propagasaun sira husi variante foun SARS-CoV-2, no nune’e bele proteje saúde públika no kapasidade resposta husi Sistema Nasionál Saúde nian, Governu propoin ba Señór Prezidente Repúblika katak, ho renovasaun estadu emerjénsia nian, permite suspensaun ka restrisaun ba direitu no garantia fundamentál balun.
Konsellu Ministrus aprova ona projetu Dekretu-Lei ne’ebé aprezenta husi Ministru Finansas, Rui Augusto Gomes, ne’ebé ho objetivu atu kria apoiu finanseiru ba kazu mate ka inkapasidade tanba rezultadu husi inokulasaun ho vasina kontra COVID-19. Projetu Dekretu-Lei ida-ne’e sai ona hanesan objetu deliberasaun nian iha Sorumutuk Konsellu Ministrus iha loron 23 fulan-juñu tinan 2021, maibé tanba iha alterasaun balun iha faze redasaun finál nian, presiza submete fali Dekretu Lei ne’e ba deliberasaun foun Konsellu Ministrus nian. Maske risku husi efeitu sekundáriu grave ne’ebé provoka husi vasina kontra COVID-19 ki’ik tebes, ne’ebé kompensa makas tebes ho benefísiu husi vasinasaun ba populasaun einjerál, inisiativa lejizlativa ida-ne’e ho objetivu atu prevene situasaun, exesionál loos, iha ne’ebé ninia efeitu sekundáriu sira grave liu, hodi prevee kompensasaun loloos ba ema ne’ebé hetan efeitu sekundáriu hirak ne’e. Dekretu-Lei ne’e define katak iha kazu inkapasidade ki’ik liu 30% ne’ebé provoka husi vasina kontra COVID-19 sei atribui kompensasaun ida ho valór dolar amerikanu rihun ida, karik inkapasidade ne’ebé iha husi 30% to’o 70% sei atribui valór dolar amerikanu 2100 no iha kazu vasina provoka inkapasidade boot liu 70% sei atribui dolar amerikanu rihun 7. Iha kazu mate ne’ebé bele akontese tanba simu vasina, sei atribui kompensasaun ida ho valór dolar amerikanu rihun sanulu. Verifikasaun ba situasaun mate nian ka inkapasidade no ninia relasaun ho vasina kontra COVID-19 sei hala’o liuhusi avaliasaun médika no Ministériu Saúde maka sei responsavel ba rekoñesimentu direitu apoiu ne’e nian. REMATA
