Vise-Primeiru-Ministru no Ministru Planu no Ordenamentu, José Maria dos Reis, ne’ebé akompaña husi Ministra Negósius Estranjeirus no Kooperasaun, Adaljiza Magno no Membru Delegasaun sira, ohin, partisipa iha Konferénsia Xefe Estadu no Xefe Governu Komunidade País sira Lian Portugés (CPLP) nian ba da-13, ne’ebé hala’o iha Luanda, Angola, iha loron 17 fulan-jullu, tinan 2021.

Simeira Luanda ne’e ninia lema mak “Harii no Hametin Futuru Komún no Sustentavel ida” no hala’o iha loron ne’ebé CPLP selebra ninia aniversáriu ba da-25.

Durante Simeira Luanda ne’e, Zacarias Albano da Costa, eis Ministru Negósius Estranjeirus Timor-Leste nian, simu pose nu’udar Sekretáriu Ezekutivu CPLP nian, hodi troka Francisco Ribeiro Telles, husi Portugál. Kabu Verde ofisiálmente remata ona ninia mandatu no Repúblika Angola asume prezidénsia rotativa CPLP nian.

Vise-Primeiru-Ministru ne’e, iha ninia intervensaun durante simeira, salienta katak “tinan ida ne’e, nu’udar tinan ida ne’ebé espesiál liu ba ita-nia Komunidade, ne’ebé komemora sékulu kahaat ida, tinan 25 dahuluk ba ninia ezisténsia.

Na’i-ulun ne’e mós afirma katak “haree ba katak ameasa no dezafiu sira, ne’ebé besik daudaun ho karater globál” país membru sira tenke “aprende atu serbisu iha rede” no tenke “aprende atu dezenvolve parseria hodi provoka investimentu no dezenvolve setór privadu”.

Hanoin fali ba liafuan hirak Prezidente Nicolau Lobato nian, iha ninia diskursu ikus nian iha tinan 1978, Vise Primeiru Ministru konklui ninia intervensaun hodi hateten katak “ita bele sai komunidade ki’ik oan ida iha mundu rai klaran ne’e, maibé vontade atu halo buat barak no di’ak liu ba ita-nia povu maka sei lori ita ba vitória ne’ebé barak liu”.