Governu Timor-Leste hato’o nia solidariedade ba Alemaña no Béljika
Prezidénsia Konsellu Ministrus
VIII Governu Konstitusionál
...........................................................................................................................
Komunikadu Imprensa
Governu Timor-Leste hato’o nia solidariedade ba Alemaña no Béljika
Lori povu Timor-Leste nia naran, Governu hato’o sentidas kondolénsias ba família no belun sira husi vítima inundasaun grave nian ne’ebé afeta Alemaña, parte oeste, no Béljika, parte leste, iha kinta-feira ne’e, madrugada.
Pelumenus ema na’in 103, iha Alemaña, parte oeste, no ema na’in 23, iha Béljika, rejiaun Valônia nian maka mate tanba katástrofe naturál boot liu ne’ebé akontese iha Europa sentrál. Sei iha ema rihun ida liu maka lakon iha inundasaun, ne’ebé antes ne’e nunka akontese, ne’ebé afeta liuliu Alemaña no Béljika, maibé mos nasaun seluk-seluk tan iha rejiaun ne’e.
Udan ne’ebé boot estraga karreta, uma no mós dalan sira, halo ema barak maka la asesu ba eletrisidade no telekomunikasaun.
Governu Timor-Leste louva serbisu autoridade sira husi nasaun hirak ne’ebé afetadu iha sira-nia serbisu hodi buka no salva ema sira, iha kondisaun sira ne’ebé difisil tebetebes.
Portavós Governu Konstitusionál VIII, Ministru Fidelis Magalhães, o Ministro Fidelis Magalhães, iha Primeiru-Ministru, Taur Matan Ruak no Governu tomak nia naran, hateten katak “ami-nia kondolénsias kle’an tebes ami hato’o ba família sira ne’ebé maka lakon sira nia ema ne’ebé sira hadomi no ami hahi’i sira ne’ebé kontinua buka ema sira ne’ebé maka lakon. Iha loron difisil hirak ne’e, Timor-Leste hatudu ninia solidariedade ba Governu no populasaun tomak Alemaña no Béljika nian. REMATA
