Governu Timor-Leste, liuhusi ekipa negosiasaun ne’ebé lidera husi Ministru Koordenadór Asuntus Ekonómikus (MKAE), Eng. Joaquim Amaral, kontinua halibur esforsu sira ho hanoin atu prepara dokumentasaun téknika nesesária ba partisipasaun Timor-Leste nian iha sorumutuk daruak Negosiasaun Altu Nivel nian husi Grupu Serbisu Organizasaun Mundiál Komérsiu (OMK) nian, iha loron 29 fulan-jullu oinmai.

Iha fulan-dezembru tinan 2016, OMK kria ona Grupu Traballu ida ba adezaun Timor-Leste nian no fó ona ba país ne’e estatutu observadór nian. Iha loron 1 fulan-outubru tinan 2020, iha sorumutuk dahuluk Negosiasaun Altu Nivel ho membru sira OMK nian, Timor-Leste aprezenta ona Memorandu ida kona-ba Rejime Komérsiu Esternu, ne’ebé daudaun ne’e iha hela prosesu faze diskusaun nian.

Iha ámbitu preparasaun dokumentasaun téknika nian ba enkontru daruak ho membru sira OMK nian, hala’o ona, iha loron 16 fulan-jullu liubá, sorumutuk ida komisaun interministeriál nian, iha ne’ebé membru Governu sira ne’ebé integra iha ekipa negosiasaun nian partisipa, nune’e mós governante sira seluk ne’ebé relevante ba prosesu adezaun Timor-Leste nian. Sorumutuk ida-ne’e hala’o iha sentru konferénsia City 8 nian, iha Dili.

Hafoin enkontru interministeriál ne’e, Xefe Negosiadór hala’o ona sorumutuk, iha loron 15 fulan-jullu, ho Grupu Serbisu Tékniku adezaun nian ba Organizasaun Mundiál Komérsiu nian, iha sala sorumutuk TradeInvest, iha Dili. Reprezentante sira husi liña ministeriál no ajénsia autónoma sira ne’ebé integra iha Grupu Traballu partisipa iha sorumutuk ne’e.

Durante enkontru ne’e, membru sira Grupu Serbisu nian halo ona análize ba  vizaun jerál prosesu nian no prioridade setoriál nian sira, nune’e mós, dokumentasaun téknika no lejizlasaun ne’ebé presiza iha prosesu adezaun nian ba OMK.

Organizasaun Mundiál Komérsiu nu’udar organizasaun ida-ne’ebé trata regra komersiál entre nasaun sira ho objetivu atu garante katak atividade komersiál sira la’o ho forma livre no tuir previzaun.