Primeiru-Ministru, Taur Matan Ruak no Koordenadór-Rezidente Organizasaun Nasoins Unidas  (ONU) nian iha Timor-Leste, Roy Trivedy, asina ona “Deklarasaun Koligasaun ba Merenda Eskolár nian: Nutrisaun, Saúde no Edukasaun ba labarik sira hotu”, iha loron 14 fulan-jullu, tinan 2021, iha Palásiu Governu, Dili.

Akordu ida ne’e atu apoia programa Merenda Eskolár, mosu hodi renova kompromisu komún entre Governu no Ajénsia sira ONU nian hodi hamenus deznutrisaun, hodi hadi’a seguransa ai-han no hodi avansa ba ai-han ida ne’ebé sustentavel, saudavel no segura.

Primeiru-Ministru, iha ninia intervensaun, konsidera katak Merenda Eskolár ne’e “hanesan instrumentu importante ida atu fornese loron-loron pelumenus hahán ida ne’ebé dignu, nutritivu no saudavel ba labarik no foin-sa’e sira hotu, no hadi’a sira-nia dezenvolvimentu no kreximentu sustentavel”.

Primeiru-Ministru hatutan katak “hahán ne’e kontribui loloos atu  enkoraja partisipasaun eskolár, hodi hamenus absenteízmu ka abandonu, nune’e mós hodi insentiva produsaun nasionál ba produtu alimentár sira-ne’ebé saudavel, nutritivu, biolójiku no amigu ambiente nian sira”.

Durante serimónia ne’e, Koordenadór-Rezidente ONU nian iha Timor-Leste no reprezentante husi Organizasaun Mundiál Saúde nian, Arvind Mathur, reprezentante husi UNICEF, Bilal Durrani no reprezentante husi Programa Alimentár Mundiál nian, Dageng Liu, afirma filafali sira-nia kompromisu hodi apoia Governu atubele halakon má nutrisaun.