Governu Timor-Leste

Prezidente Komisaun Funsaun Públika (KFP), Eng. Libório Pereira, halo intervista hodi prense programa rádiu ho nia titulu “Adeus konflitus Benvindu Dezenvolvimentu” iha RTL, loron 4 fulan, hodi esplika kona-ba servisu KFP nian, nia natureza servisu no planu estratéjiku ba tinan lima nian.

Komisaun Funsaun Públika nu’udar instituisaun Estadu nian hari’i liu husi lei no. 7, lei parlamentar, komisaun ne’e kompostu husi ema nian lima nebé nain 3 nomea husi governu nain rua seluk husi parlamentu nasionál, maibé hetan nomeasaun ka posse husi Primeiru Ministru. No simu posse dahuluk nian iha loron 14 fulan augostu tinan 2009 ba komisáriu nain 3 nebé hili husi governu. No simu posse daruak nian ne’e iha loron 13 fulan Outubru tinan 2009, ba komisáriu nain rua nebé hili husi Parlamentu Nasionál.

Prezidente Komisaun Funsaun Públika, Eng. Libório Pereira iha nia intrevista esplika katak “Husi ema nain lima ne’e nain 3 hala’o servisu hanesan iha termus dedikasaun ekslusiva nian katak servisu permanente durante mandatu tinan lima, no nain rua sira seluk servisu hanesan tempu parsiál katak wainhira iha sesaun servisu nian prezidenti konvoka reuniaun maka sira nain rua atende tantu reuniaun ka aktividade sira nebé konvokadu iha komisaun funsaun publika nian. Komisáriu sira ne’e mak hanesan; atan hau Libório Pereira mak hetan fiar hanesan prezidenti Komisaun Funsaun Publika nian, (nomeia husi Governu) komisáriu Abel Ximenes, (nomeia husi Governu) komasária Olandina Caeiro, (nomeia husi Governu) no komisária Jejuinha Gomes, (nomeia husi Parlamentu Nasionál) ho Komisáriu Alexandre Corte-real nomeadu husi Parlamentu Nasionál no hala’o sira ninia servisu ho dedikasaun exklusiva”.

Komisaun Funsaun Públika nu’udar instituisaun estadu nian nebé ho nia natureza independente katak la hetan intervensaun polítika, la hetan tantu instrusaun husi identidade nebé deit, hala’o nia servisu kaer metin ba nia prinsipiu imparsialidade ho prinsipiu méritus, katak funsaun públika tau matan ba prosesu rekrutamentu hare’e ba ema nia matenek no badaen no la hare’e ba ema ne’e mai husi grupu nebé no partidu nebé. Komisaun Funsaun Publika tau matan mos ba nomeasaun. Nomeasaun ba kargu sira iha diresaun, kargu diresaun no Xefia hanesan diretór jeral, diretór nasional no diretór distritál no mos ba xefe departamentu no xefe seksaun kaer nafatin prinsipiu méritu. haktuir Presidente.

Aleinde ne’e Prezidente Komisaun Funsaun Públika esplika mos katak “foin dadauk aprova ona planu estratéjiku, iha planu ne’e ami defini nia prioridades, objetivu no estratejia no hare’e katak iha prioridade ha’at mak komisaun funsaun públika konsidera inportante hanesan; Lidera jestaun dezempeñu funsaun públika, hadia kuadru jestaun servisu ba administrasaun públika nian, dezenvolve no sustenta kapasidade funsionáriu públiku nian no hari’i kapasidade komisaun funsaun públiku rasik. Planu ne’e to’o 2014 ne’e planu estratéjiku ba tinan lima nian.

Tuir lei no. 7 komisaun da funsaun publika tinan-tinan halo nia relatóriu ba parlamentu nasional, kopia ba governu, no iha nia servisu lor-loron barak liu servisu hamutuk ho governu tanba servisu administrasaun publika ne’e, ne’e kna’ar governu nian, iha konstituisaun katak governu mak hamatan ka tau matan ba administrasaun publiku nu’udar mákina estadu.