Sistema irigasaun iha Bebui
Primeiru-Ministru hala’o observasaun direitamente ba iha konstruksaun Irigasaun Bebui no kanalizasaun bee ba Natar iha Suku Uaitame no Suku Afalokai iha Sub-Distritu Watulari, Distritu Viqueque, Sesta 30/04.
Baseia ba ejijensia husi povu Suku Matahoi, Waitame no Afaloikai katak hanesan povu ki’ik ne’ebé móris hanesan agrikultor no vida loron-loron iha natar, maibe durante tinan rua ona la halai natar tanba la iha bee. Impaktu husi rehabilitasaun irigasaun Bebui ne’ebé to’o agora seidauk hotu no tuir informasaun katak, praju servisu kompania nian liu tiha ona maibe konstruksaun seidauk remata.
Tanba ho ejisensia ida ne’e mak Primeiru-Ministru, Kay Rala Xanana Gusmão hala’o kedas observasaun direitamente ba iha konstruksaun irigasaun refere. Tanba iha loron hanesan reprezentante povu iha Parlamentu Nasional husi komisaun D no G ne’ebé hala’o mós fizkalizasaun ba iha irigasaun katak konstruksun ba iha kanalizasaun irigasaun ne’e laiha kualidade.
Primeiru-Ministru observa no koalia deretamente ho Sekretariu Estadu Agrikultura no Arborikultura no kontraktór ne’ebé manan projetu ba irigasaun ne’e no husu ba sira kompañia hodi fó toleransia servisu refere hahu iha, sabadu loron 1/5/2010 to’o iha 9/06/2010 hodi loke ba agrikultór sira atu halo hikas sira nia natar.
Iha okaziaun ne’e mós Diretór kompañia ne’ebé manan konkursu ba irigasaun Bebui hatan katak, nia sei hakaas an atu servisu iha fulan ida nia laran no Primeiru-Ministru, Kay Rala Xanana Gusmão, sei fila fali mai iha loron 10 fulan Junu hodi loke bee ba populasaun atu halai natar nune irigasaun nee bele loke ona ba komunidade.
Iha Observasaun ba konstruksaun irigasaun Bebui no kanalizasaun bee ba natar iha Suku Uaitame no suku Afalokai Sub-Distritu Watulari. Primeiru-Ministru, Kay Rala Xanana Gusmão, akompana direitamente husi Sekretáriu Estadu Agrikultura no Arbóriukultura, Marcus da Cruz no Sekretáriu Estadu Seguransa, Francisco Guterres, labarik no komunidade Suku Uaitame no Afaloikai.
