Governu, liuhusi Ministériu Finansas, iha loron 30 fulan-juñu tinan 2021, organiza Jornada Orsamentál, semináriu ida ne’ebé marka inísiu husi preparasaun Orsamentu Jerál Estadu (OJE) tinan 2022, iha auditóriu Xanana Gusmão nian, iha Ministériu Finansas, Dili.

Semináriu ne’e prezide husi Primeiru-Ministru, Taur Matan Ruak ho tema “Kualidade orsamentál, kreximentu inkluzivu no sustentavel”.

Durante enkontru ne’e, membru Governu sira define ona área prioritária neen ba Orsamentu Jerál Estadu ba tinan 2022 nian, atubele atinje objetivu boot atu alkansa dezenvolvimentu ida ho kualidade no kreximentu sustentavel no inkluzivu. Prioridade neen ba tinan 2022 maka: 1) dezenvolvimentu kapitál umanu (edukasaun, formasaun profisionál no saúde); 2)abitasaun no inkluzaun sosiál); 3) setór produtivu (agrikultura no turizmu), ambiente no konetividade; 4) dezenvolvimentu setór privadu; 5) dezenvolvimentu rurál; no 6) Governasaun.

Atu kumpre prioridade no programa sira ne’ebé define ona ne’e, tetu orsamentál hetan ona aprovasaun ho valór dolar millaun 1.523,78.

Jornada orsamentál konta mós ho aprezentasaun kona-ba diretiva no meta hirak ne’ebé atinje ona, kona-ba impaktu sira husi COVID-19 no problema estruturál prinsipál sira no kona-ba kontribuisaun setór finanseiru ba dezenvolvimentu ekonómiku.

Primeiru-Ministru, iha ninia intervensaun ikus iha eventu ne’e nia rohan, agradese ba prezensa husi diretór-jerál no diretór nasionál sira, dirijente sira husi órgaun autónomu sira no lideransa komunitária no husu atu kontinua kontribui ba esforsu sira elaborasaun orsamentu ida-ne’e, tuir prioridade sira ne’ebé define ona ba tinan oinmai.

Ministru Finansas, Rui Augusto Gomes, iha ninia diskursu abertura Jornada Orsamentál nian defende katak “orsamentasaun ne’e bazeia ba programa sira ne’ebé fó dalan atu garante katak osan ne’ebé tinan-tinan hasai husi Fundu Mina-rai,  husi kobransa impostu husi kontribuinte sira no husi empréstimu husi doadór sira, uza duni atu fó benefísiu ba povu, atu hasa’e kualidade husi prestasaun servisu públiku sira no atu alkansa meta sira ne’ebé aprova ona husi Governu”.

Portavós Governu Konstitusionál VIII nian, Ministru Prezidénsia Konsellu Ministrus, Fidelis Manuel Leite Magalhães, hateten katak “Jornada Orsamentál ne’e hanesan oportunidade importante ida ba Governu hodi define prioridade nasionál sira, ho forma koordenada no adekuada ba planeamentu no implementasaun programa dezenvolvimentu nian sira, atubele define envelope fiskál ida ba tinan 2022, ne’ebé fó resposta ba impaktu sosioekonómiku sira husi COVID-19 no promove rekuperasaun ita-nia ekonomia no moris-di’ak sosiál”.