Vise-Primeiru-Ministru no Ministru Planu no Ordenamentu (MPO), José Maria dos Reis, asina Memorandu Entendimentu ho Magnifiku Reitór Universidade Nasionál Timor Lorosa’e (UNTL), João Soares Martins, iha loron 22, fulan juñu, tinan 2021, iha Gabinete MPO, Fatuhada, Dili.

Memorandu Entendimentu ida ne’e sai nudár akordu entre entidade rua ne’e atu UNTL bele kolabora ho MPO, liu husi Sentru Planeamentu Integradu, iha prosesu ba Reajustamentu Planu Dezenvolvimentu Estratéjiku (PED) no iha dezenvolvimentu polítika estrategika nasionál sira.

Prosesu ba Reajustamentu PED aprovadu husi Rezolusaun Konsellu Ministru nian, iha semana kotuk, ho kriasaun Komisaun Institusionál ne’ebé lidera husi Primeiru-Ministru, Taur Matan Ruak, no sei kompoin mós husi Vise-Primeiru Ministru na’in rua, Ministru Prezidénsia Konsellu Ministrus, Ministru Koordenadór ba Asuntus Ekonómikus no Ministra Negósius Estranjeirus no Kooperasaun.

Komisaun traballu, ne’ebé koordena husi Sentru Planu Integradu (CPI) husi Ministériu Plano no Ordenamentu, ne’ebé lidera diretamente husi Ministru rasik tuir Lei Orgánika MPO nian, sei hala’o traballu tékniku no sei halo koordenasaun ho UPMA no ho servisu tékniku husi grupu Universidade.

Vise-Primeiru-Ministru hato’o mós katak tamba rekoñese katak papél akadémiku sira nian importante tebes iha prosesu dezenvolvimentu polítikas no estratéjika.

Tamba ida ne’e, Memorandu Entendimentu ne’ebé foin asina loke dalan atu reforsa no habelar kolaborasaun entre MPO no UNTL, atu dezenvolve konsulta, diskusaun no Semináriu iha area relevante sira, inklui ho foku liu ba sira hanesan Planeamentu Urbanu, Planeamentu Ordenamentu Territóriu no liga ba Reajustamentu Planu Estratéjiku Dezenvolvimentu. Ida ne’e mós oportunidade diak tebes atu UNTL bele iha planu atu prepara kuadru sira ne’ebé nesesáriu atu responde ba merkadu dezenvolvimentu iha tinan 20-30 oin mai.