Iha semana kotuk, Primeiru-Ministru Kay Rala Xanana Gusmão, akompanha husi Vise-Ministru Ekonomia no Dezenvolvimentu, Cristiano da Costa, Komandante PNTL, Mateus Fernandes, Administradór ezercisiu Baucau, António Guterres, Administradór sub-distritu Venilale no Padre Paroquia Venilale halo kampanha kona-ba Planu Estratéjiku Dezenvolvimentu Nasionál (PEDN), iha sub-distritu Venilale, distritu Baucau.

Planu Estratéjiku Dezenvolvimentu Nasionál (PEDN), hanesan biblia ba polítiku sira dehan katak, ukun ba maibe povu tenke móris diak. Iha okaziaun kampnha ne’e Primeiru-Ministru, Kay Rala Xanana Gusmão, mós husu ba komunidade individual husi sub-distritu sira atu hari’i emprezariu ida-idak.

Primeiru-Ministru rasik lembara fali ba komunidade sub-distritu Venilale kona-ba mensajen aniversáriu Refrendum ba tinan sanulu iha loron 30 fulan Agostu tinan liu ba katak, hapara ona violensia iha fatin, nune’e mós Primeiru Ministru subliña tan kona-ba lei oartidu polítiku hateten katak, partidu polítiku sira tenke eduka povu no tolera ba malu hodi labele soran povu, bele kritika malun maibe labele basa malun.

Kona-ba vizaun futuru Timor-Leste nian, nia relasaun ho Pakote Referendum no kompetensia emprezariu ne’e bé atu executa projektu sira ne’e. Iha posibilidade no importante emprezariu sira ne’e mai duni hosi suku ne’e nia laran para populasaun bele akompanha projektu sira ne’e.

“Wainhira, iha projetu ruma mak tama iha imi nia suku, imi komunidade rasik mak tenke monitoriza uluk. Hato’o ba emprezariu ne’e atu halo dia-diak projetu tamba imi mak sei uza rejultadu husi projetu ne’ebé hala’o. Kuandu la diak, imi komunidade tenke husu ba emprezáriu atu halo diak. Maibe, atu projetu ida iha suku bele hetan kualidade diak, emprezáriu ne’e tenke mai duni husi Sub-Distritu refere,” hatete Xanana.