Governu ba iha Parlamentu Nasionál hodi debate estratéjia nasionál kona-ba prevensaun no kombate COVID-19, iha loron 14 fulan-juñu tinan 2021.

Ekipa Governu nian ne’e lidera husi Ministru Prezidénsia Konsellu Ministrus, Fidelis Magalhães, reprezenta Primeiru-Ministru, Taur Matan Ruak, no komposta husi titulár oin-oin husi ministériu relevante sira iha ámbitu prevensaun no kombate COVID-19.

Iha debate ne’e, membru Governu sira hatán ba dúvida no preokupasaun sira husi membru Parlamentu Nasionál nian sira, halo pontu situasaun kona-ba implementasaun husi medida hirak ne’ebé daudaun ne’e la’o hela atu kombate virus SARS-CoV-2 no atu hatán ba ninia impaktu sosiuekonómiku sira.

Governante sira destaka katak ho kampaña vasinasaun nian ne’ebé la’o daudaun no aumentu husi kuantidade ema ne’ebé simu ona vasina, númeru kazu infesaun foun no kazu ativu loron-loron nian hahú menus. 

Tanba ne’e, sira apela dala ida tan atu sidadaun hotu-hotu partisipa iha kampaña vasinasaun nian no reafirma katak vasina ne’ebé eziste iha país ne’e, AstraZeneca no Sinovac, seguru no efikáz hotu.

Se maka seidauk simu vasina, bele ba simu doze dahuluk vasina AstraZeneca nian iha sentru saúde sira, iha Ospitál Nasionál Guido Valadares, postu imunizasaun nian sira, iha suku no aldeia sira. 

Doze dahuluk husi vasina Sinovac nian bele simu iha UNTL, iha Maternidade Fatumeta, iha Asosiasaun Xineza Hudi Laran nian, Fatuhada no Aimutin, iha Institute of Bussines (IOB), iha Dili Institute of Technology (DIT) no iha Sekretaria Estadu Juventude no Desportu.

Se maka kompleta ona períodu semana ualu hahú husi simu vasina AstraZeneca doze dahuluk nian, bele simu doze daruak iha sentru saúde sira, iha Ospitál Nasionál Guido Valadares, iha Sentru Konvensaun Dili (CCD), iha Maternidade Fatumeta, iha Xanana Sport Center, iha Timor Plaza no iha Sentru Juveníl Bekora.