Primeiru-Ministru, Taur Matan Ruak, iha loron 7 fulan-juñu tinan 2021, simu Ministra Negósius Estranjeirus no Kooperasaun, Adalzija Albertina Xavier Reis Magno, iha ninia rezidénsia ofisiál, iha ámbitu preparasaun ba partisipasaun Timor-Leste nian iha Konferénsia XIII Xefe Estadu no Governu sira husi Komunidade País sira Lian-Portugés nian (CPLP, Sigla iha lian-portugés).

Simeira CPLP ne’e sei hala’o iha loron 16 no 17 fulan-jullu, iha Luanda, Angola, monu iha loron ne’ebé marka tinan 25 CPLP nian, ne’ebé harii iha loron 17 fulan-jullu tinan 1996.

Durante Simeira iha Luanda ne’e, Zacarias Albano da Costa, antigu Ministru Negósius Estranjeirus Timor-Leste nian, sei troka portugés Francisco Ribeiro Telles hanesan Sekretáriu Ezekutivu CPLP nian. Kabuverde mós sei termina ofisialmente ninia mandatu, no Angola maka sei kaer fali knaar prezidénsia CPLP nian.

Durante enkontru ne’e, Xefe Governu no Ministra ko’alia kona-ba kestaun sira ne’ebé iha relasaun ho organizasaun partisiapasaun Timor-Leste nian iha Simeira no lideransa Sekretariadu Ezekutivu CPLP nian iha oinmai, knaar ne’ebé ba dala uluk maka Timor-Leste asume.

Adaljiza Magno hateten katak tema ida ne’ebé ko’alia iha Simeira Luanda nian maka Akordu kona-ba Mobilidade entre nasaun CPLP nian sira, ne’ebé bele fó dalan, hanesan ezemplu, ba estudante ka médiku sira bele sirkula iha CPLP nian sein presiza vistu. Kombate hasoru COVID-19 sei sai hanesan temátika seluk ne’ebé sei analiza durante Konferénsia XIII Xefe Estadu no Governu sira husi Komunidade País sira Lian Portugés nian.

CPLP harii iha loron 17 fulan-jullu tinan 1996, iha Lizboa, no kompostu husi Estadu-Membru sira – Angola, Brazíl, Kabuverde, Giné-Bisau, Giné Ekuatoriál, Portugál, Mosambike, Saun Tomé no Prínsipe no Timor-Leste.

Organizasaun luzófona ne’e ninia objetivu maka konsertasaun-polítiku-diplomátiku no kooperasaun iha ninia área hotu entre membru sira no promosaun no defeza ba lian-portugés.