Primeiru-Ministru hanesan mós Ministru Interior, Taur Matan Ruak, segunda dader iha rezidénsia Farol, bolu Vise-Ministru Interior, Antonio Armindo ho Komandante Jeral Polísia Nasionál Timor-Leste (PNTL), Komisáriu Polísia Faustino da Costa, no nia Segundu, Komisáriu Polísia Mateus Fernandes, hodi buka hatene liután prosesu ba kazu tiru iha Lahane Osidentál sábadu semana kotuk ne’ebé involve hosi ajente PNTL ida, hodi rezulta aman no oan mate no na’in ida seluk kanek todan, aleinde ne’e buka hatene mós kona-ba situasaun seguransa rai-laran liuliu kapitál Dili, relasionadu kazu refere.

“Sua Eselénsia Primeiru-Ministru hanesan Ministru Interior, ajenda ne’e mai husi Sua Eselénsia nia Gabinete para bolu ha’u ho Komandante Jerál no Segundu Komandante Jeral, para mai atu enkontru aprezenta situasaun rai laran liuliu iha Dili, nomós aprezenta kona-ba situasaun ne’ebé mak akontese foin daudaun dia 5 iha Lahane,” dehan Vise-Ministru Interior.

Enkuantu Komandante Jerál PNTL, Faustino da Costa, hateten kazu Lahane Osidentál, Komandu foti ona medidas hasoru pesoál refere tantu prosesu administrativu no kriminál. “Prosesu la’o ona í dala ida tan oknum [pesoál] ka autór ne’ebé halo asaun ida ne’e administrativamente, Instituisaun Estadu nian Komandu nia kompeténsia aplika ona ba nia, í segundu para atu iha transparénsia ba kazu ida ne’e maka PNTL koordena kedas ho Polísia Sientífika Investigasaun Kriminál (PSIK) ne’ebé halo atende ona prosesu kazu ida ne’e, tantu husi autor nomós armas ne’ebé nia uza PSIK sei halo ezame balístiku tantu submente ba prosesu, ne’ebé administrativamente ida primeiru asaun ne’ebé halo ba membru ida ne’e, segundu mós halo asaun administrativamente ba parte sira seluk atu responde ba situasaun ida ne’e,” tenik Komandante Jerál PNTL.

Komisáriu PNTL ne’e husu atu define entre pesoál no Instituisaun no husu atu kontinua tau konfiansa ba tanba instituisaun PNTL nu’udar Institusaun Estadu nian no povu tomak nian ne’ebé harii atu tau matan ba seguransa povu nian, no asegura lei na ordem.

Komisáriu Polísia promete, Komandu PNTL sei halo esforsu hotu atu hadi’ak faillansu sira ne’e, no realsa sei la tolera nein elementu ka Komandante ne’ebé involve iha kazu sira hanesan. “Mudansa tenke halo, koezaun ba Institusaun tenke iha, ida ho akontesimentu dala hira komesa husi Tasi-Tolu hanesan mós iha Taibesi tantu Lahane nian, mak Komandu sei la tolera tan se de’it atu membru ida ka Komandante ida mak afilha atu implementa regras ne’ebé mak iha, konsekuénsia sei atribui ba nia,” hakotu.