Iha tempu fulan rua nia laran, dezde inísiu kampaña vasinasaun nian, iha loron 7 fulan-abríl tinan 2021, Ministériu Saúde fó ona vasina doze dahuluk kontra COVID-19 nian ba ema na’in 87.230.

Vasina hirak ne’e barak liu maka distribui iha Dili, munisípiu ne’ebé afetadu liu husi surtu SARS-CoV-2, iha ne’ebé sona ona doze 74.659, ne’ebé korresponde ba 35% husi populasaun ho tinan 18 liu iha kapitál.

Iha Dili, 97% husi ema ho tinan 18 to’o 59 no ho ema ho komorbidade (ema sira ne’ebé iha nanis ona moras oin-oin) simu ona vasina doze dahuluk, no sona ona vasina COVID-19 ba 19% husi ema ho tinan 60 ba leten.

Autoridade saúde nian kontinua apela ba populasaun tomak, liu-liu ba ema sira ne’ebé ho tinan 60 ba leten atubele simu vasina.

Dadus ikus liu, ne’ebé rejista horseik loron 3 fulan-juñu tinan 2021, hatudu katak Timor-Leste iha totál akumuladu 7422 infetadu ho SARS-CoV-2 no ema na’in 16 maka mate ona tanba infetadu ho virus ne’e, hahú kedas husi momentu pandemia ne’e mosu.

Iha mundu tomak, sura hamutuk ema millaun 171 resin mak infetadu ona no millaun 3,6 resin maka mate ho COVID-19.