Governu Timor-Leste

Prezidénsia Konsellu Ministrus

VIII Governu Konstitusionál

...........................................................................................................................

Komunikadu Imprensa

Sorumutuk Konsellu Ministrus nian iha loron 2 fulan-juñu tinan 2021

Konsellu Ministrus hala’o sorumutuk iha Ministériu Finansas, iha Dili no aprova ona projetu Dekretu-Lei ba kriasaun suplementu remuneratóriu ida ba traballadór administrasaun públika nian sira ne’ebé hala’o atividade profisionál iha servisu sira prevensaun ka kontrolu COVID-19 nian ka iha kondisaun sira ne’ebé hasoru direta virus SARS-Cov-2, ne’ebé aprezenta husi Ministru Finansas, Rui Augusto Gomes. Valór suplementu remuneratóriu ne’e nian sei estabelese liuhusi Rezolusaun Governu nian no sei iha iha diferensa tuir grau risku nian ne’ebé traballadór sira-ne’e hasoru. Projetu Dekretu-Lei ida ne’e prodús efeitu hahú kedas iha loron 1 fulan-abríl tinan 2021.

Hetan ona mós aprovasaun husi Konsellu Ministrus, autorizasaun ba selebrasaun akordu ida, husi Ministru Finansas, entre Governu Timor-Leste no Governu Austrália, kona-ba kontribuisaun finanseira direta ida atu apoia rezilénsia komunitária no rekuperasaun ekonómika iha Timor-Leste durante pandemia globál COVID-19. Governu Austrália sei fó kontribuisaun finanseira direta ida ho valór dolar austrálianu millaun 20 (besik dolar amerikanu millaun 15,5) hodi fó apoiu ba komunidade sira no hadi’a sira-nia infraestrutura sira liuhusi Programa Nasionál Dezenvolvimentu Suku (PNDS), no mós orsamenta no implementa projetu Bolsa Mãe Jerasaun Foun.

Konsellu Ministrus atribui podér tomak ba Ministru Asuntu Parlamentár no Komunikasaun Sosiál, Francisco Martins da Costa Pereira Jerónimo, ba negosiasaun kona-ba akordu ho Governu Repúblika Populár Xina nian ba Faze Daruak husi Projetu Sistema Tranzmisaun Televizaun Dijitál Terrestre (Digital Television Terrestrial Multimedia Broadcasting, DTMB) iha Timor-Leste. Projetu ne’e hahú iha tinan 2019 no daudaun ne’e Governu hakarak haluan projetu ne’e no aumenta kobertura nasionál televizaun dijitál terrestre ho instalasaun ba estasaun emisora barak liután.

Ikusliu, Ministru Koordenadór Asuntus Ekonómikus, Joaquim Amaral, aprezenta opsaun polítiku-lejizlativa sira ne’ebé sai hanesan baze ba projetu kona-ba Reforma Lisensiamentu Atividade Ekonómika. Proposta lubun ida ne’ebé aprezenta ne’e hakarak atu rezolve lakuna no problema sira ne’ebé eziste iha lisensiamentu ba atividade ekonómika sira ho objetivu atu hadi’a ambiente negósiu nian, liuliu ba dezenvolvimentu ekonómiku nasionál. REMATA