Ministru Finansas, Rui Augusto Gomes, partisipa iha Diálogu Polítika Altu Nível ho Kanni Wignaraja, Adjunta Sekretária Jerál Nasoins Unidas, Adjunta Administradora UNDP, Diretora UNDP Rejionál ba Ázia no Pasífiku, Profesór Ha-Joon Chang, ekonomista koñesidu ida iha área dezenvolvimentu husi University of Cambridge no Roy Trivedy, Koordenadór Rezidente Nasoins Unidas.

Diálogu polítika ne’e lidera husi Reprezentante Rezidente UNDP, Tuya Altangerel ho títulu “Imajina Futuru Timor-Leste ho Indústria ida ne’ebé Forte iha área Ekonomia Oseanu”.

Iha diálogu ne’e, Ministru Finansas, Rui Augusto Gomes fahe informasaun kona-ba situasaun atuál makroekonómiku iha Timor-Leste no projesaun makroekonómiku ne’ebé bele akontese iha tinan hirak tuir-mai atu pozisiona Timor-Leste iha trajetória kresimentu ne’ebé sei lori mudansa ba dezenvolvimentu sustentável, reziliente no inkluzivu.

Durante diskusaun, Governante ne’e mós realsa katak figura rua importante ne’e nia komentáriu pertinente tebes iha tempu kritiku ne’e, tanba Timor-Leste hakarak atu atinji estatutu país ida ho rendimentu-médiu altu iha tinan 2030, maske hasoru hela problema estruturál oioin no oinsá atu bele harii fila-fali ho di’ak liután depoisde infrenta resesaun ekonómiku 3 iha tinan 4 nia laran, xoke esternu Covid-19 no Inundasaun iha fulan-Abril.

Diskusaun ne’e mós kobre asuntu dezenvolvimentu umanu, empregu dignu ba juventude sira, polítika ne’ebé promove ambiente amigável inklui enerjia renovável. Tópiku hirak ne’e aliña ho Governu ninia polítika fiskál 2021 no programa rekuperasaun ekonómiku ne’ebé koloka “Ema” mak sentru ba dezenvolvimentu.

Akompaña Ministru Finansas iha diálogu ne’e, Xefe Gabinete Ministru Finansas, Jo Monteiro, Diretór Jerál Jestaun no Mobilizasaun Rekursu Esternu, António Freitas, Diretor Jerál Planeamentu no Orsamentu, Jose Alexandre de Carvalho inklui membrus Sekretariadu Tékniku, Kuadru Finansiamentu Nasionál Integradu (INFF, sigla Inglés).