Ministru Prezidénsia Konsellu Ministrus, Fidelis Manuel Leite Magalhães, hala’o surumutuk iha loron 31 fulan-maiu tinan 2021, ho Koordenadór Rezidente Nasoins Unidas nian iha Timor-Leste, Roy Trivedy, iha ámbitu lansamentu estudu “motór kreximentu no transformasaun setoriál Timor-Leste nian”, ne’ebé sei aprezenta ba membru Governu sira iha retiru Ezekutivu nian iha loron-kuarta mai ne’e.

Estudu ida-ne’e prepara bazeia ba pedidu husi Ministru Prezidénsia Konsellu Ministrus nian. Sentru Internasionál Kreximentu (International Growth Center, IGC) hamutuk ho Gabinete Reforma Administrativa Prezidénsia Konsellu Minstrus maka prepara estudu ne’e no hetan apoiu husi Organizasaun Nasoins Unidas.

Estudu kona-ba motór potensiál sira ba kreximentu no transformasaun setoriál iha Timor-Leste ne’e ninia objetivu maka atu projeta evedénsia sira no fornese rekomendasaun sira kona-ba polítika atu hodi orienta polítika Govermenu nian sira atubele alkansa diversifikasaun ekonómia ne’ebé boot liután iha setór la’ós mina-rai nian sira no koloka país ne’e iha dalan dezenvolvimentu nian ne’ebé sustentavel liu iha prazu médiu no prazu naruk.

IGC maka sentru peskiza ekonomia nian ida, harii iha tinan 2008, ne’ebé rezulta husi parseria entre London School of Economics and Political Science no Universidade Oxford.