Ministru Finansas, Rui Gomes reprezenta Governu Timor-Leste no Diretór Misaun USAID, James Wright reprezenta Governu Estadus Unidus Amérika (EUA), ohin dadeer, loron 19 fulan-Maiu tinan 2021 asina ona Akordu Kontribuisaun Finanseira ba Objetivu Dezenvolvementu (DOAG, sigla Inglés) ho montante osan millaun $17,9 husi totál kontribuisaun estimadu millaun $92,3.

Kontribuisaun finanseira ne’e sei aloka ba iha setór Saúde no Boa Governasaun no setór la’ós-petrolíferu mak hanesan Turizmu, Agrikultura no Ekonomia. Setór ne’ebé mak konsidera potensiál atu diversifika ekonomia maibé seidauk dezenvolve ho di’ak iha pasadu.

Iha nia diskursu abertura, Ministru Rui Gomes hateten “Ho Asinatura Akordu ne’e, USAID no Governu Timor-Leste komprometidu atu serbisu hamutuk atu hadi’ak Timoroan sira-nia moris. Liuhusi Akordu ne’e, Estadus Unidus Amérika hatudu sira-nia konfiansa ba Governu no Povu Timor-Leste hodi fornese Kontribuisaun Finanseira millaun $92,3 ba tinan-haat ho balun, to’o iha Dezembru 2025. Faze foun husi parseria ida-ne’e, sei kontinua atu apoiu Ministériu Finansas nia Reforma Aduaneira ne’ebé foku ba dezenvolvementu setór privadu, partikularmente relasiona ho kadeia valór agrikultura no turizmu no haforsa liután USAID nia apoiu ba iha setór saúde. Ha’u hato’o obrigado barak ba Governu Estadus Unidus Amérika no Povu Amerikanu ba sira-nia apoiu no liuhusi parseria foun ida-ne’e, ami prontu atu haforsa liután Ita-nia parseria atu hadi’ak Timoroan sira-nia moris.”

Ministru Rui Gomes akompaña husi Vise-Ministra Finansas, Sara Lobo Brites, Ministru Prezidénsia Konsellu Ministrus, Fidelis Magalhães, Ministru Turizmu, Komérsiu no Indústria, José Lucas do Carmo da Silva, Ministru Agrikultura no Peskas, Pedro dos Reis no Vise-Ministru Saúde, Bonífacio Maucoli dos Reis. Enkuantu Diretór Misaun USAID Timor-Leste akompaña husi Embaixadór EUA, Kevin Blackstone.