Ekipa Fundu Monetáriu Internasionál (IMF, sigla Inglés) ne’ebé lidera husi Pablo Lopez Murphy konklui ona Misaun Artigu IV mai Timor-Leste durante loron-lima no fó sai rekomendasaun prinsipál tolu: (i) Ekonomia Timor-Leste afeitadu tebes husi pandemia COVID-19 no inundasaun foin lailais ne’e. Espera iha rekuperasaun modesta iha tinan-2021 liuhusi apoiu fiskál ida ne’ebé forte, aumentu iha konsume privadu no implementasaun programa vasina COVID-19 ne’ebé hahú ona iha abril, (ii) Prioridade prinsipál ida mak tenke vasina populasaun adultu ho lais no fornese asisténsia finanseiru ba ema ne’ebé mak vulnerável liu, afeitadu husi pandemia no inundasaun foin lailais ne’e, (iii) Hafoin-COVID, esforsu-sira tenke konsentra atu koloka pozisaun fiskál ida ho baze ida ne’ebé forte no iha reforma estruturál atu kria empregu no diversifika ekonomia.

Hahú husi 10 maiu to’o 18 maiu 2021, ekipa IMF halo diskusaun online ho liña ministériu relevante no Ajénsia Autonómu sira kona-ba situasaun atuál ekonomia Timor-Leste, progresu to’o ohinlorin no dezafiu úniku ne’ebé mak Timor-Leste enfrenta.

Ekipa ne’e hahú ho sorumutuk virtuál ho Ministériu Finansas no Banku Sentrál Timor-Leste hodi atualiza sira kona-ba vizaun jerál makroekonómiku Timor-Leste. 

Ekipa ne’e mós halo sorumutuk virtuál ho Ministériu Agrikultura no Peskas no Ministériu Turizmu, Komérsiu no Indústria. Setór importante rua ba Timor-Leste iha ninia esforsu atu diversifika ekonomia husi dependénsia ba minarai. Setór rua ikus ne’e mós afeitadu maka’as husi COVID-19 no inundasaun foin lailais ne’e. Maibé, konsidera potensiál atu harii fila-fali hodi apoiu atividade buka moris no empregu ne’ebé dignu.

Nafatin iha ámbitu diversifikasaun ekonomia, ekipa IMF mós hetan informasaun detalla kona-ba dezenvolvementu setór privadu liuhusi sira-nia diskusaun ho reprezentante-sira husi CCI-TL, TradeInvest, SERVE no SEFOPE. Parte interesada hirak ne’e hato’o problema no nesesidade atu harmoniza lei no regulamentu-sira.

Ekipa IMF mós halo sorumutuk virtual ho Ministériu Petróleu no Minerál, Autoridade Nasionál Petróleu no Minerál, Timor Gap no konklui ho sorumutuk ho Komisaun Anti-Korupsaun kona-ba asuntu boa governasaun iha setór públiku liuliu bainhira engaja ho setór privadu no aprovizionamentu. Komisaun ne’e mós infoma sira-nia progresu Lei Anti-Korupsaun ne’ebé mak passa ona foin lailais ne’e nomós sira-nia limitasaun rekursus.

Ba oin, ekipa Misaun Artigu IV sei prepara no submete relatóriu ne’ebe kuñesidu ho naran Relatóriu Artigu IV IMF. Relatóriu ne’e sei fasilita governu iha dezenvolvementu polítika fiskál ida ne’ebé di’ak ba iha kurtu, mediu no longu prazu. Relatóriu ne’e mós sei serve hanesan referénsia ida ba Governu iha faze preparasaun no elaborasaun OJE 2022. Ezersisiu ida ne’ebé mak daudaun ne’e Ministériu Finansas komesa halo ona.