……………………………………………………………………………………………………………
Dili, loron 18 fulan-maiu tinan 2021
Komunikadu Imprensa
Primeiru-Ministru hato’o Kondolénsias ba vítima asidente ró-bero
Primeiru-Ministru Taur Matan Ruak sente triste no lamenta ho notísia kona-ba asidente ró-bero tula ema na’in 7 ne’ebé mout iha tasi klaran entre Ataúru-Dili, wainhira hala’o viajen hosi Dili ba Illa Ataúru iha sábadu semana kotuk.
Iha akontesimentu refere, ema na’in tolu mak konsege salva-an nani sai, na’in rua hetan ona ho kondisaun mate, enkuantu na’in rua seluk seidauk hatene sira-nia paradeiru.
Primeiru-Ministru Taur Matan Ruak:
“Ha’u sente triste no lamenta tebes wainhira rona notísia kona-ba ró mout iha tasi atu ba Ataúru, ne’ebé tula ita-nia sidadaun na’in 7, grasas a Deus na’in 3 konsege salva-an, i infelizmente sira na’in rua mate hetan ona, no na’in rua seluk ita seidauk hatene paradeiru.
Nune’e iha momentu difisil ida ne’e, hodi ha’u-nia naran rasik no Governu nia naran, hakarak hato’o profundas sentidas kondolénsias ba família matebian na’in rua nian, no apoiu solidariedade ba família na’in rua ne’ebé nia família seidauk hetan iha akontesimentu difisil ida ne’e; husu kontinua korajem no mai ita hasa’e orasaun ba Maromak atu bele hatudu dalan hodi bele hetan lalais ita-nia maluk na’in rua ne’ebé seidauk hetan.
Iha biban ne’e, hakarak apela mós ba Ataúru-oan sira, atu atensaun didi’ak ba klima tasi, molok atu hala’o viajen ho ró ki’ik ba Ataúru, atu labele akontese tan asidente hanesan liubá ne’e, ita-nia vida importante, nune’e husu kuidadu an”. Remata