Vise-Ministru Komérsiu no Indústria lansa Sekretariadu ba Integrasaun no Diversifikasaun Ekonómika

Vise-Ministru Komérsiu no Industria, Domingos Lopes Antunes, iha loron 30 fulan-abríl tinan 2021, lansa ona, ba dala uluk, Sekretariadu ba Integrasaun no Diversifikasaun  Ekonómika, ne’ebé hamahan an ba Ministériu Turizmu, Komérsiu no Industria.

Inisiativa ne’e hanesan konkretizaun ida tan husi kompromisu Governu nian atu hala’o polítika, kuadru legál regulamentár sira ne’ebé adekuadu liu ba esforsu integrasaun no diversifikasaun ekonómika Timor-Leste nian.

Sekretariadu ne’e kompostu husi unidade tolu ne’ebé keta-ketak, hanesan Unidade Integrasaun Ekonómika Rejionál, Unidade Diversifikasaun Ekonómika no Unidade Kooperasaun Nasionál no Internasionál.

Iha lansamentu ne’e, Vise-Ministru esplika katak sekretariadu ne’e estabelese bazeia ba papél primordiál ministériu nian. Estrutura foun ne’e sei fó apoiu tékniku ba ministériu iha asuntu hotu-hotu ne’ebé relasiona ho integrasaun no diversifikasun ekonómika.

Serbisu espesífiku balu ne’ebé daudaun ne’e sekretariadu ne’e hala’o hela maka inklui reforsu kapasidade doméstiku ba adezaun ba ASEAN, OMK no APE, kontribuisaun ba implementasaun medida sira ba planu rekuperasaun ekonómika iha prazu badak no naruk no halo koordenasaun ho interveniente nasionál no internasionál hotu-hotu, hanesan setór privadu no parseiru dezenvolvimentu implementadór sira.

Vise-Ministru ne’e hateten mós katak ninia ekipa daudaun ne’e prepara hela atu organiza diálogu ida ho setór privadu no parseiru dezenvolvimentu implementadór sira, atubele aliña sira-nia prioridade no objetivu sira ho esforsu kona-ba integrasaun no diversifikasaun ekonómika.

Vise-Ministru ne’e agradese ba parte hotu-hotu ne’ebé fó ona apoiu, to’o oras ne’e, ba prosesu kriasun sekretariadu ne’e nian, liuliu ba ekipa husi Banku Dezenvolvimentu Aziátiku (BDA) no ba Ajénsia Kooperasaun Internasionál Japaun niann (JICA) ba sira-nia apoiu tékniku ne’ebé fó bebeik, no agradese mós ba apoiu husi parseiru dezenvolvimentu nian sira seluk, hanesan Embaixada sira husi Estadu Membru ASEAN nian sira, USAID, UE, GIZ, PNUD, UN-ESCAP, KOIKA, DFAT, Embaixada Nova Zelándia no sira seluk.