Ohin, loron 5 fulan-maiu tinan 2021, to’o ona iha Timor-Leste, vasina AstraZeneca rihun 20 ne’ebé Austrália oferese.  Ida ne’e nu’udar pakote dahuluk husi vasina sira-ne’ebé Austrália fó ba Timor-Leste no prevee katak vasina rihun 10 sei to’o mai tan iha loron 19 fulan-maiu.

Pakote vasina nian ne’e to’o iha Timor-Leste iha duni loron ne’ebé vasina rihun 24 dahuluk ne’ebé to’o iha país ne’e liuhusi mekanizmu COVAX nian halo fulan ida loloos.

Vasina sira-ne’e entrega ofisialmente husi Embaixadór Austrália nian, Peter Roberts, ba Ministra Saúde, Odete Freitas Belo, no ba Ministra Negósiu Estramjieru no Kooperasaun, Adaljiza Magno, iha serimónia ne’ebé hala’o  iha Aeroportu Internasionál  Prezidente Nicolau Lobato.  Partisipa mós iha serimónia ne’e maka reprezentante sira husi UNICEF  no Organizasaun Saúde Mundiál.

Iha ninia intervensaun, Ministra Saúde agradese ba “Governu Austrália ba ninia kontribuisaun ba povu Timor-Leste” no  lori Ministériu Saúde no Governu nia naran agradese mós “ba apoiu hotu ne’ebé simu husi doadór, Ajénsia internasionál, organizasaun la’ós govermentál  nasionál no estranjeira sira”, “ iha momentu difisil ne’ebé Timor-Leste hasoru, iha luta kontra pandemia COVID-19 no iha resposta ba dezastre naturál sira”.

Ministra ne’e salienta katak vasina rihun 20 ne’e ninia alvu prioritária sira maka “grupu vulneravel ka grupu sira ne’bé iha risku, ho probabilidade boot atu baixa iha ospitál no lakon sira-nia moris”, hanesan “ema ho idade tinan 60 ba leten no ema sira ne’ebe sofre moras krónika sira hanesan tensaun aas, diabetes, moras rins ne’ebé presiza fase raan, tuberkuloze no bronkite krónika no mós ema sira ho HIV/sida.

Oras ne’e daudaun Timor-Leste iha kazu ativu virus SARS-CoV-2 nian hamutuk 1414 no rejista infetadu hamutuk hotu 2786 dezde inísiu pandemia ne’e nian.  To’o ohin loron hamutuk ema na’in haat ne’ebé infetada husi Koronavirsu foun  maka  mate ona.