Ministru Turízmu, Komérsiu no Indústria, Gil da Costa Alves, akompaña husi Vise Ministru Finansas, Rui Manuel Hanjam no Sekretáriu Estadu Meiu Ambiente Abílio Lima, inaugura Jardim Rai Henek Mutin, Sesta, loron 23 fulan Abril.

Gil Alves, mós informa tan katak agora dadaun ne’e sira servisu hamutuk ho Sekretáriu Estadu Seguransa ba área seguransa nian hodi ka’er manutensaun, Ministériu Turízmu, Komérsiu no Indústria, sei ka’er kona-ba limpeza nian no mós ho Sekretáriu Estadu Kultura ba área kultura no mós sei servisu hamutuk ho Ministériu sira seluk.

Planu ne’ebé halo ne’e ba públiku tomak liu-liu hodi bele hahú hadia imajen ita nia rai no tanba ho ida-ne’e se’e mak manan. Konserteza Timór laran tomak mak sei manan, povu tomak mak sei manan ho Governu nia konserva ba praia sira ne’e.

Iha fatin hanesan, Manajer Kompañia Montana Diak, informa katak hahú servisu ida- ne’e husi Areia Branka to’o Kristu-Rei, hasoru dezafiu bo’ot teb-tebes, maibé ho konsiénsia no aten brani hahú servisu ida-ne’e ohin loron remata kompañia ne’e mós la haluha agradese ba MTCI ne’ebé durante ne’e fó fiar ba sira nu’udar kontratór.

Kompañia Montana Di’ak hala’o servisu ida-ne’e maski hasoru buat barak iha terenu. Ho oportunidade ida ne’e ba maluk tomak sira husi kompaña montanha diak mós hakarak kontribui ba nasaun ida-ne’e, la’os kontribuisaun ba nasaun ida-ne’e liu husi osan, maibé realidade ita haree dadaun husi Kristu-Rei katak Kompañia kuaze prodús dalan alkatraun ho naruk metru atus haat no ninian luan 7,60cm.

Iha fatin hanesan Xefe Suku Metiaut, Francisco Xavier, hato’o katak, programa ne’ebé Governu hala’o di’ak, maibé falta ida mak tau seguransa metin ba iha sasán sira ne’e atu ema lebele mai estraga hanesan baku rahun lampu estraga estatua no labele foti.

Iha fatin hanesan André Pires, hanesan povu husi Aldeia Karunglulau-rua, Suku Metiaut, informa mós inisiativa husi Governu ne’e di’ak teb-tebes, maibé komunidade sei triste no la kontente iha liña eletrisidade tanba husi Santa-Ana mai to’o iha Metiaut liña eletrisidade di’ak, maibé hosi área ro tunda mai to’o Cristo Rei liña la diak, tanba ne’e Governu tau ona lampu bo’ot sira ne’e, husu atu haree mós ba iha liña eletrisidade.