Primeiru-Ministru Taur Matan Ruak, kinta-feira dader ne’e, loron 22 fulan-abril tinan 2021, iha Palásiu Governu, simu  Embaixador Xina  mai  Timor-Leste, Xiao Jianguo, hodi  ko’alia kle’an liutan  kona-ba  apoiu Xina  nian partikularmente  konba-ba vasina kontra COVID-19 ne’ebé Xefe Governu halo ona pedidu ofisial ba nia omólogu Xinez, Li Keqiang iha fulan Marsu.

Resposta Xefe Governu nian ne’e,  hetan resposta pozitivu mós hosi Governu Beijing, ne’ebé Governu Xina  sei  fó  100.000 doses vasina Sinovac ba Governu Dili atu uja ba vasina populasaun sira hodi iha imunidade kontra  COVID-19.

Embaixadór Xiao informa, Xina no Timor-Leste nu’udar amigus diak iha tempu naruk,  Xina konsidera Timor-Leste hanesan viziñu diak, amigu no parseiru diak.  Xina sempre fó apoiu ba prosessu luta ba independensia, konstrusaun nasional no mós ba dezenvolvimentu.

Embaixador ne’e  hatutan, anunsia ohin nian marka importansia progresu ida iha kooperasaun bilateral no espera donasaun ida ne’e bele haforsa abilidade Timoroan nian iha kombate COVID-19 no fasilita rekuperasaun lalais iha ekonómia no inundasaun.

“Dezde surtu ba Covid-19, Timor-Leste no Xina hamriik hamutuk no apoia malu mutuamente. Xina nu’udar País ne’ebé hatutan liman hodi haruka aviaun fretada/charter mai Timor-Leste iha prosesu ba kombate pandemia ne’e. Bazeia ba pedidu husi parte Timor nian, Governu Xina konkorda bazeia ba pedidu husi Governu Timor – Leste atu haruka 100,000 doses vasina Sinovac ba Covid-19 mai Governu Timor – Leste.

Prezidente Xinês, Xi Jinping hateten iha tempu ida katak Xina sei honra nia kompromissu atu halo vasina ba diak públiku global nian. Xina firmemente fiar ba produsaun vasina ba COVID ba diak públiku nian no Xina halo servisu seriamente hodi hadiak asessibilidade ba nasaun ne’ebé sei dezenvolve, inklui Timor – Leste. Informa Embaixador Xina ba Jornalista sira hafoin enkontru ho Primeiru-Ministru.

Ikus liu Xefe Ezekutivu agradese através Embaixadór Xina ba apoiu sira hosi povu no Governu Xines nian durante ne’e, liuliu iha períodu pandemia ne’e, ne’ebé bele ajuda tebes Governu Timor iha luta kontra surtu ne’e.