Primeiru-Ministru, Taur Matan Ruak, sesta ne’e, loron 16 fulan-abril tinan  2021, iha Palásiu Governu, Dili, simu Embaixadór Xina ba Timor-Leste, Xiao Jiangou hodi atualiza kona-ba evolusaun situasaun COVID-19, inundasaun ne’ebé akontese iha loron 4 fulan abril liubá no polítika Governu nian ba rekuperasaun.

Hafoin atualiza pontu ne’e, Xefe Governu husu apoiu Xina nian ba planu rekuperasaun nian, no partikularmente husu Xina nia apoiu ba uma temporáriu ba família afetadu sira ne’ebé uma lakon durante kalamidade liubá ne’e.

Hatán ba tulun uma provizóriu, Embaixadór Xiao Jianguo, hateten nia parte konsidera no a nota hela, hodi hatutan Xina iha komitmentu boot hodi kontinua serbisu hamutuk ho Governu Timor-Leste no fó apoiu nafatin. Kona-ba karta Primeiru-Ministru Timor-Leste nian ba nia ómologu Xines, iha ona sinal pozitivu, iha ne’ebé Xina mós prontu atu oferese vasina ne’ebé produz iha Xina ba Governu Dili, no garante vasina Xina nian ne’e seguru ne’ebé kuaze uja ona ba nasaun barak, inklui País viziñu Indonézia. Nia mos hatutan, Xina prontu ajuda Timor-Leste iha planu rekonstrusaun nian.

Entretantu Governu Timor-Leste mós husu ona tulun ba Austrália atu apoiu konstrui uma temporáriu prefabrikadu rihun 1 para fasilita atu realoka família sira ne’ebé uma hetan estragus total iha loron 4 fulan-abril liuba, liuliu iha Tasi Tolu, sira ne’ebé okupa mota laran, no rai lolon sira hodi ba hela provizóriu.