Karta pedidu ofisiál Sua Eselénsia Primeiru-Ministru Taur Matan Ruak nian ne’ebé haruka ba nia ómologu Australianu, Scott Morrison, iha semana kotuk, hetan ona resposta pozitivu, katak Governu Austrália aseita prontu atu fó apoiu vasina ba Governu Timor-Leste tuir pedidu ne’ebé fó.

Liuhosi reuniaun Xefe Governu ho Embaixadór Austrália nian iha Timor-Leste, Peter Roberts, tersa-ne’e iha Palasiu Governu, Embaixadór Peter Roberts entrega karta resposta hosi Primeiru-Ministru Austrália nian ba Xefe Governu Timor-Leste.

Xefe Governu Taur Matan Ruak sente kontente ba karta resposta hosi nia ómologu nian ne’e, nune’e aproveita Embaixador Austrália, hodi nia naran rasik, Governu no povu Timor-Leste, agradese tebes ba Primeiru-Ministru Scott Morrison, Embaixadór Peter Roberts, no em jerál ba povu no Governu Australianu sira-nia jenerosidade tulun Timor-Leste atu vasina ba populasaun sira hodi iha imunidade kontra virus SARS-CoV-2.

Embaixadór Austrália iha Dili, Peter Roberts kompromete, Austrália iha kompromisu sei kontinua apoiu Timor-Leste tuir prioridade sira Governu nian.

 Governu Austrália mós anunsia ona ba públiku tulun emerjensia dolar australianu millaun 7 atu fó asisténsia emerjénsia imediata ba populasaun sira ne’ebé afetadu hosi bee sa’e kauza hosi udan boot no anin iha loron 4 fulan-abril liubá.

Durante intervensaun Imunizasaun Nasionál ba vasina COVID-19 iha loron 7 fulan abril iha Bairru Formoza, Xefe Governu deklara, hato’o ona pedidu formal ba nia ómologu Australianu, Scott Morrison atu apoiu vasina tipu AstraZeneca ba Timor-Leste hodi bele kompleta vasina 20% ne’ebé Timor-Leste hetan ona hosi sistema COVAX.